Молитва Богу Сыну

We use cookies. Read the Privacy and Cookie Policy

Молитва Богу Сыну

Единородне Сыне и Слове Божий, изволивый нашего ради спасения воплотитися и смерть претерпети, ныне же, и с пречистою плотию Твоею, на небесех на престоле со Отцем седяй и всем миром управляяй, не забуди милосердием Твоим нас, долу сущих и многими напастьми и скорбьми искушаемых, иже аще и весьма нечисти и недостойни есмы, но в Тебя, Спасителя и Господа нашего, веруем и иного Ходатая и надежды спасения не вемы. Подаждь, о Искупителю Всеблагий, да памятуем выну, коликих мучений души и тела Твоего потребно бяше, во еже удовлити за грехи наша вечной правде Отца Твоего, и како даже до ада со Креста низшел еси пречистою душею Твоею, да нас власти и мучительства адова свободиши: памятующе же о сем, да блюдемся от страстей и грехов, бывших виною лютых страданий и смерти Твоея, и да любим правду и добродетель, еже всякаго дара Тебе в нас приятнейше есть. Яко искушенный по всяческим, Сам веси, о Всеблагий, коль велика есть немощь духа и плоти нашея, а враг наш силен и злохитр, яко лев рыкая ходит, иский кого поглотити: не остави убо нас Своею всесильною помощию и буди с нами выну, храня и покрывая, наставляя и укрепляя, радуя и веселя дух наш. Мы же, на лоно любви и милосердия Твоего повергающеся, весь живот наш, временный и вечный, Тебе предаем, нашему Владыце, Искупителю и Господу, моляще из глубины души, да, имиже веси судьбами, сотвориши нам прейти безбедно мрачную жития сего земнаго юдоль и достигнути Богокраснаго чертога Твоего, егоже обещал еси уготовати всем, верующим во имя Твое и последующим Божественным стопам Твоим. Аминь.

Данный текст является ознакомительным фрагментом.