ИЗ ПОСЛЕДОВАНИЯ В НЕДЕЛЮ ПРАВОСЛАВИЯ

ИЗ ПОСЛЕДОВАНИЯ В НЕДЕЛЮ ПРАВОСЛАВИЯ

Отрицающим бытие Божие и утверждающим, яко мир сей есть самобытен, и вся в нем без промысла Божия и по случаю бывают, анафема (трижды).

Глаголящим Бога не быти Дух, но плоть: или не быти Его праведна, милосердна, премудра, всеведуща, и подобная хуления произносящим, анафема (трижды).

Дерзающим глаголити, яко Сын Божий не единосущный и равночестный Отцу, такожде и Дух святый, и исповедающим Отца, и Сына, и Святаго Духа, не единого быти Бога, анафема (трижды).

Безумне глаголющим, не нужно быти ко спасению нашему и ко грехов пришествие в мир Сына Божия во плоти и Его вольное страдание, смерть и воскресение, анафема (трижды).

Не приемлющим благодати искупления Евангелием проповеданного, яко единственного вашего ко оправданию пред Богом средства, анафема (трижды).

Дерзающим глаголати, яко Пречистая Дева Мария не бысть прежде рождества, в рождестве и по рождестве Дева, анафема (трижды).

Не верующим, яко Дух Святый умудри пророков и апостолов, и чрез них возвести нам истинный путь к вечному спасению, и утверди сие чудесами, и ныне в сердцах верных и истинных христиан обитает и наставляет их на всякую истину, анафема (трижды).

Отмещущим безсмертие души, кончину века, суд будущий и воздаянне вечное за добродетели на небесех, а за грехи осуждение, анафема (трижды).

Отмещущим вся таинства святая, Церковью Христовой содержимая, анафема (трижды).

Отвергающим Соборы святых Отец и их Предания, Божественному Откровению согласная и Православно-Кафолическою Церковью благочестно хранимая, анафема (трижды).

Помышляющим, яко православные Государи возводятся на престолы не по особливому о Них Божию благоволению, и при помазании дарования Святаго Духа к прохождению великого сего звания в Них не изливаются: и тако дерзающим противу Их на бунт и измену, анафема (трижды).

Ругающим и хулящим святые иконы, их же Святая Церковь ко воспоминанию дел Божиих и угодников Его, ради возбуждения взирающих на оныя ко Благочестию, и ко оных подражанию приемлет, и глаголющим: оныя быти идолы, — анафема (трижды).