Тропари и кондаки новопрославленным святым на поместном соборе русской православной Церкви в Троице-Сергиевой лавре 6–9 VII 1988

Тропари и кондаки новопрославленным святым на поместном соборе русской православной Церкви в Троице-Сергиевой лавре 6–9 VII 1988

Указания дней памяти даны по старому стилю

10 октября: Преподобнаго Амвросия Оптинскаго (1812–1891)

Тропарь, гл. 5

Яко к целебному источнику, притекаем к тебе, Амвросие, отче наш, ты бо на путь спасения нас верно наставляеши, молитвами от бед и напастей охраняеши, в телесных и душевных скорбех утешаеши, паче же смирению, терпению и любви научаеши, моли Человеколюбца Христа и Заступницу Усердную спастися душам нашим.

Кондак, глас 2

Завет Пастыреначальника исполнив, старчества благодать наследовал еси, болезнуя сердцем о всех с верою притекающих к тебе; темже и мы, чада твоя, с любовию вопием ти: отче святый Амвросие, моли Христа Бога спастися душам нашим.

15 ноября: ПреподОБнаго Паисия Величковскаго (1722–1794)

Тропарь, глас 2

Странен быв на земли, небеснаго отечества достигл еси, преподобие отче Паисие, добротолюбия подвижниче, верных научил еси ум к Богу возводити и сердцем к Нему взывати: Господи Иисусе Христе, Сыне Божий, помилуй мя, грешнаго.

Кондак, глас 8

Избранный иноческаго жития ревнителю, яко пчела многотрудная, писаньми отеческими души наша снабдил еси, коегождо наставляя на путь спасения, сего ради зовем ти: радуйся, Паисие премудре, старчества духовнаго в стране нашей возродителю.

30 декабря: Святителя Макария, Митрополита Московского и всея Руси (1482–1563)

Тропарь, гл. 4

Яко великим пастырем единонравна, и учителем вселенныя единомысленна, Божии Премудрости служителя изрядна, иже блаженству тезоимениту, днесь вернии вси воспоим: Христа Бога моли, святителю Макарие, умирити мир и спасти души наша.

Кондак, гл. 3

Богомудрым учением и книжным списанием потщался еси, святителю Макарие, люди Российския просветити, и святых земли нашея прославити. Сего ради чуден пронаречеся, преемниче первопрестольников Российских. Моли сохранитися нам в вере и благочестии невредимо.

10 января: Святителя Феофана, епископа Тамковскаго (1815–1894)

Тропарь, глас 8

Православия наставниче, благочестия учителю и чистоты, Вышинский подвижниче, святителю Феофане богомудре, писаньми твоими Слово Божие изъяснил еси и всем верным путь ко спасению указал еси; моли Христа Бога спастися душам нашим.

Кондак, глас 4

Богоявлению тезоименитый, святителю Феофане, учении твоими многия люди просветил еси, со ангелы ныне предстоя Престолу Святыя Троицы, моли непрестанно о всех нас.

21 января: Преподобнаго Максима Грека. (1470–1556)

Тропарь, гл. 8

Зарею Духа облистаемь, витийствующих богомудренно сподобился еси разумения, неведением омраченная сердца человеков светом благочестия просвещая, пресветел явился еси Православия светильник, Максиме преподобие, отонудуже ревности ради Всевидящаго, отечества чужд и странен, Российския страны был еси пресельник, страдания темниц и заточения от самодержавнаго претерпев, десницею Вышняго венчаешися и чудодействуеши преславная. И о нас ходатай буди непреложен, чтущих любовию святую память твою.

Кондак, гл. тойже

Богодухновенным Писанием и Богословия проповеданием неверствующих суемудрие обличил еси, всебогате, паче же, в Православии исправляя, на стезю истиннаго познания наставил еси, якоже свирель Богогласная, услаждая слышащих разумы, непрестанно веселиши, Максиме досточудне, сего ради молим тя: моли Христа Бога грехов оставление низпослати верою поющим всесвятое твое успение, Максиме, отче наш.

24 января: Блаженныя Ксении Петербургския, Христа ради юродивыя (1732—начало XIX в.)

Тропарь, гл. 7

Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восирияла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.

Кондак, глас 3

Днесь светло ликует град святаго Петра, яко множество скорбящих обретают утешение, на твоя молитвы надеющеся, Ксение всеблаженная, ты бо еси граду сему похвала и утверждение.

30 апреля: Святителя Игнатия, епископа Кавказскаго и Черноморскаго (1807–1867)

Тропарь, гл. 8

Православия поборниче, покаяния и молитвы делателю и учителю изрядный, архиереев богодухновенное украшение, монашествующих славо и похвало: писании твоими вся ны уцеломудрил еси. Цевнице духовная, Игнатие богомудре, моли Слова Христа Бога, Егоже носил еси в сердце твоем, даровати нам прежде конца покаяние.

Кондак, гл. 8 Аще и совершил еси стезю жития земнаго, святителю Игнатие, обаче непрестанно зрел еси законы бытия вечнаго; сему поучая ученики словесы многими, имже последовати и нам, святче, помолися.

19 мая: Святаго благовернаго великаго князя Московскаго Димитрия Донскаго (1350—1389

Тропарь, гл. 3

Велика обрете в бедах тя поборника земля Русская, языки побеждающа. Якоже на Доне Мамаеву низложил еси гордыню, на подвиг сей прияв благословение иреиодобнаго Сергия, тако, княже Димитрие, Христу Богу молися, даровати нам велию милость.

Кондак, гл. 2

Подвиги твоими, святе Димитрие, страну нашу Бог сохрани, Давый тебе непобедимую. И ныне, предстателю крепкий, соблюдай молитвами святыми град твой Москву невредим от всех навет вражиих.

4 июля: Преподобнаго Андрея Рублева (1360—первая половина XV века)

Тропарь, гл. 3

Божественнаго света лучами облистаемый, преподобие Андрее, Христа познал еси — Божию Премудрость и Силу и иконою Святыя Троицы всему миру проповедал еси Единство во Святей Троице, мы же со удивлением и радостию вопием ти: имея дерзновение ко Пресвятей Троице, моли просветити души наша.

Кондак, глас 8 От юности к Божественной красоте устремляяся, чудный иконописец в земли Российстей был еси, и, богоносным твоим учителем поревновав, сиянием добродетелей украсил еси, преподобие Андрее, темже и явися Церкве нашея похвала и радование.

* * *

Константинопольский патриархат причислил к лику святых старца Силуана (Антонова) Афонского, родом из Тамбовской губернии. Память его совершается 24 сентября.

Можно надеяться, что в скором времени великий русский праведник — отец Иоанн Кронштадтский также будет канонизирован.

В нашем веке кровь множества мучеников, гонимых за веру и религию, оросила землю русскую. В ожидании канонизации тех из них, кого Богу будет угодно прославить, будем молиться вместе с ними:

О Боже, Ты даешь для Родины моей

Тепло и урожай, дары святые неба,

Но, хлебом золотя простор ее полей,

Ей также, Господи, духовного дай хлеба.

А Майков