Молитвы Великого поста и Пасхи
Молитвы Великого поста и Пасхи
Великопостная молитва преподобного Ефрема Сирина
Читается ежедневно дома в дни Великого поста.
Господи и Владыко живота моего, дух праздности, уныния, любоначалия и празднословия не даждь ми. Дух же целомудрия, смиренномудрия, терпения и любве даруй ми, рабу Твоему. Ей, Господи, Царю, даруй ми зрети моя прегрешения и не осуждати брата моего, яко благословен еси во веки веков. Аминь.
Молитвословия Часов пасхальных
Часы пасхальные – часть богослужения дня Пасхи. Читаются также в Пасхальную седмицу вместо утренних и вечерних молитв.
Молитвами святых отцев наших, Господи Иисусе Христе, помилуй нас. Аминь.
Тропарь
Христос воскресе из мертвых, смертию смерть поправ, и сущим во гробех живот даровав. (Трижды)
Воскресение Христово видевше, поклонимся святому Господу Иисусу, Единому Безгрешному. Кресту Твоему поклоняемся, Христе, и святое Воскресение Твое поем и славим. Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову Воскресению: се бо прииде Крестом радость всему миру. Всегда благословяще Господа, поем Воскресение Его: распятие бо претерпев, смертию смерть разруши. (Трижды)
Кондак
Аще и во гроб снизшел еси, Безсмертне, но адову разрушил еси силу, и воскресл еси яко Победитель, Христе Боже, женам мироносицам вещавый: Радуйтеся! и Твоим апостолом мир даруяй, падшим подаяй воскресение.
Во гробе плотски, во аде же с душею яко Бог, в рай же с разбойником, и на Престоле был еси, Христе, со Отцем и Духом, вся исполняяй, неописанный.
Слава Отцу и Сыну и Святому Духу и ныне и присно и во веки веков. Аминь.
Яко Живоносец, яко рая краснейший, воистину и чертога всякаго царскаго показася светлейший, Христе, гроб Твой, источник нашего Воскресения.
Вышняго освещенное Божественное селение, радуйся: Тобою бо дадеся радость, Богородице, зовущим: благословенна Ты в женах еси, Всенепорочная Владычице.
Господи помилуй. (Сорок раз)
Слава Отцу и Сыну и Святому Духу и ныне и присно и во веки веков. Аминь.
Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.
Христос воскресе из мертвых, смертию смерть поправ, и сущим во гробех живот даровав. (Трижды)
Молитвами святых отцев наших, Господи Иисусе Христе, помилуй нас. Аминь.