Тропарь Пресвятой Богородице «Млекопитательница»

Тропарь Пресвятой Богородице «Млекопитательница»

(память 25 января нов. ст./12 января ст. ст.)

Глас третий

Без семене от Божественнаго Духа, волею же Отчею зачала еси Сына Божия, от Отца без матере прежде век суща, нас же ради из Тебе без отца бывша, плотию родила еси, и Младенца млеком питала еси, темже не престай молити избавитися от бед душам нашим.

Кондак. Глас пятый

Душ наших чувствия очистивше, узрим на иконе таинство преславное, Творца Вселенныя и Господа вышних сил, во объятиих держима и от сосцу Твоею яко Младенца питаема, и, со страхом и радостию поклоняющеся Тебе и рождшемуся от Тебе Спасу нашему, воззовем: радуйся, Владычице, жизни нашея Питательнице.

Икос

Ангельское целование услышала еси, Приснодево, и в чистоте девственней Бога зачала и Христа безболезненно родила еси, Егоже яко Младенца от сосцу Твоею млеком питала еси, Ангелы и человеки величием Твоих добродетелей удивила еси. Темже ублажаем Тя, истинную Богородицу, возвеличившую наше естество и милосердием неизреченным на род христианский призирающую. Темже умильно зовем Ти: радуйся, Владычице, Питательница жизни нашея.

Стихира. Глас шестой

Блажим Тя, вси роди, Богородице, яко радости вся ны исполнила еси явлением чудотворныя Твоея иконы Млекопитательницы и дарованием многих от нея исцелений души бо и телеса врачуеши и от всяких бед избавляеши честнаго образа Твоего осенением, емуже днесь поклоняющеся, усердно молим Тя: сподоби, Владычице, Твоя рабы в будущем веце избранных радости и в настоящем житии великия Твоея милости.