Слово святаго Афанасія о иконе Господа нашего Ісуса Христа
Слово святаго Афанасія о иконе Господа нашего Ісуса Христа
Афанасій Великій, архиепископъ Александрьскій, поведаше: чюдо преславно, достойно памяти, сътворшееся въ граде Въурите отъ иконы Христа Бога нашего. Некто хрестіанинъ, живяше въ хлевине близъ събора жидовьска, имеяше же /л. 418 б/ икону, на нейже написанъ образъ Христа Бога нашего по человеческому естеству. По времени же купи собе инъ домъ и отъиде отъ хлевины тоя, вземъ свое, остави икону Господню въ хлевине. Се же бысть по смотренію Божію, вселижеся въ ту хлевину жидовинъ, идеже бе икона Господня, и внесъ своя, живяше ту, но не ведяше, яко икона Господня стояше ту. По времени же позва на обедъ иного жидовина, друга своего. Обедающема же има, и възре званный жидовинъ, и виде икону Господню стоящу, и рече къ звавшему его: како ты, жидовинъ сый, сію икону въ храме своемъ держиши? Живяй же ту жидовинъ нача ротитися и клятися, глаголя: яко и доселе несмь ея веделъ. Отшедъ же званный жидовинъ, навади къ иереемъ, глаголя: яко онъ сый жидовинъ имеетъ икону Назарянина в дому своемъ. И исполнишася на нь все гнева, но тогда умолъчаша, понеже бе уже вечеръ. Наутрия же собра многъ народъ архиерей и старци, и пріидоша в домъ, идеже бе икона Господня, и въскочивше въ храмину, обретоша икону стоящу, /л. 418 в/ и изнесше ю, поставиша посреде събора своего и реша: якоже отци наши поругашася ему, тако и мы сътворимъ иконе сей. И начаша плевати на икону и бити по образу лица Христова сюду и овоуду, и посемъ рекоша: слышали есмы, яко и на древе пригвоздиша отци наши, да сътворимъ и мы иконе сей такоже. И вземше гвоздия въ образъ руку и ногу его вбиша, и вознесше на трость губу со оцтомъ, приложиша къ образу устъ Господень. Посемъ принесоша копіе и повелеша некоему ударити его в ребра образа Господня, и яко удари въ икону копіемъ, и абіе потече кровь и вода, и бысть страхъ великъ на всехъ жидехъ, видящихъ чюдо преславно, и наполниша сосудъ текущие воды и крови. Советъ же сътвориша, глаголюще сице: приведемъ слепыя и хромыя и бесныя, помажемъ сею кровію, да аще видимъ знаменіе, вси веруемъ Распятому: страхъ бо ны одержитъ о семъ чюдесе. И принесоша единого хрома ногама отъ рождества, ти яко помазаша отъ крове, и абіе въскочи и бысть /л. 418 г/ весь здравъ человекъ. Посемъ приведоша слепыя и ти помазани прозреша, и беснующіяся безъсчислене отъ помазаніа крове очистишася. И увидено же бысть по всему граду, и вси течаху къ неизглаголанному тому чюдеси, своя несуще недужныя, разслабленыа, прокаженныя, сухія и плазящая, и все целбу прияша. Тогда весь народъ жидовескъ вероваша въ Господа нашего Ісуса Христа, и падъше предъ образомъ иконы Господня, вопияху глаголюще со слезами: слава Тебе Христе Сыне Божій, яко таковая твориша чюдеса; слава Тебе Христе, егоже отци наши распяша. Но в тя веруемъ, приими ны припадающа ти, Владыко! Вси же жидове града того, мужи и жены и дети, къ епископу приидоша, моляще и прияти отъ него крещеніе. Икону же Господню показаша епископу, и вся яже на ней поруганія сътвориша исповедаша, и истекшую кровь и воду показаша, и многа отъ нея чюдеса сказаша. Ихже приимъ епископъ и на многы дни поучивъ и вся съ женами и съ детьми крести и, и съборище ихъ сътвори церковь Господа нашего Ісуса Христа. /л. 419 а/ Тогда бысть радость велика въ граде томъ не токмо о исцелившихъ недужныхъ, но и крестившихъся неверныхъ жидехъ, иже пріаша святую веру чюдесе ради бывшаго отъ иконы Господа нашего Ісуса Христа. Того ради всякъ христіанъ верою и любовію покланяніе творитъ святымъ иконамъ. Тому слава съ Отцемъ и Святымъ Духомъ ныне и присно и въ векы векомъ. Аминь.
Печатается по изданію: Великiя Минеи Четiи, собранныя всероссiйскимъ Митрополитомъ Макарiемъ. [Выпускъ пятый:] Октябрь, дни 4–18. / Подъ редакцiей С. Н. Палаузова и М. О. Кояловича. – Изданiе Археографической Коммиссiи. СПб: Типографiя и Литографiя А. Траншеля, 1874. – стлб. 925–927. (Памятники Славяно–Русской письменности)
Данный текст является ознакомительным фрагментом.