Молитва первая

Молитва первая

Святителю отче Митрофане! Нетлением честных твоих мощей и многими благодеяньми, чудесно содеянными и содеваемыми тобою с верою к тебе притекающим, уверившеся, яко имаши велию благодать у Господа Бога нашего, всесмиренно припадаем вси и молимся тебе: моли о нас Христа Бога нашего, да ниспослет всем, чтущим святую память твою и усердно к тебе прибегающим, богатыя милости Своя; да утвердит во святей Своей Православной Церкви живый дух правыя веры и благочестия, дух ведения и любве, дух мира и радости о Дусе Святе, да вси члены ея, чисты от мирских искушений и плотских похотений и злаго действия злых духов, духом и истиною покланяются Ему и усердно пекутся о соблюдении заповедей Его ко спасению душ своих. Пастырем ея да даст святую ревность попечения о спасении людей, им вверенных, да неверующих просветят, неведущих наставят, сомневающихся вразумят и удостоверят, отпадших от Православныя Церкве обратят в святые недра ея, верующих соблюдут в вере, грешных подвигнут к покаянию, кающихся утешат и укрепят в исправлении жизни, раскаявшихся и исправившихся утвердят в святости жизни: и тако всех введут указанным от Него путем в уготованное вечное царство святых Его. Народу же нашему православному да дарует мужество, мудрость, одоление на вся враги, радость и долгоденствие; избранным от него для управления и суда да ниспослет усердие, прозорливость, мудрость и верность, да управляют и судят к спокойствию и радости всех; всем же людям да дарует мир, тишину, безмятежие, усердие в исполнении заповедей Его, установления святыя Церкве и закона гражданскаго, и изобилие в потребном для жизни сея; и да избавит царствующия грады, град сей и вся иныя грады и веси царства Его от глада, труса, потопа, огня, меча, нашествия иноплеменных, междоусобныя брани, смертоносныя язвы и от всякаго зла. Ей святителю Божий, да устроиши молитвами твоими вся благая душам и телесем нашим: да и мы прославим в душах и телесех наших Господа и Бога нашего Иисуса Христа, Емуже со Отцем и Святым Духом слава и держава во веки веков. Аминь.