Глава 9
Глава 9
1 Царица же савска услыша имя соломоново и прииде искусити его гаданьми во Иерусалиме с силою тяжкою зело: и велблюды носящии ароматы и злата множество и камения драгаго: и прииде к соломону и глагола ему вся, елика беша в сердцы ея.
2 И возвести ей соломон вся словеса ея, и не прейде слово, егоже бы не возвестил ей.
3 И виде царица савска премудрость соломоню, и дом егоже созда,
4 И яди столов его, и седалища рабов его, и состояние служебников его и ризы их, и виночерпчия его и украшение их, и всесожжения, яже жряше в дому Господни, и вне себе бысть.
5 Рече же ко царю: истинно есть слово, еже слышах в земли моей о словесех твоих и о премудрости твоей:
6 и не веровах словесем их, дондеже приидох, и видеста очи мои, и се, не возвестиша мне половины множества премудрости твоея: приложил еси ко слышанию яже слышах:
7 блажени мужие твои и блажени раби твои сии, иже предстоят пред тобою на всяко время и слышат премудрость твою:
8 да будет Господь Бог твой благословен, иже благоволи в тебе, еже дати тя на престол свой царя Господу Богу твоему: зане возлюби Господь Бог твой израиля, еже утвердити его во век, и постави тя над ними царя, да сотвориши суд и правду.
9 Даде же царю сто двадесять талант злата и ароматы многи зело и камение драгое, и не быша ароматы таковы яко сия, яже даде царица савска царю соломону.
10 Но и раби хирамовы с рабы соломоними приношаху злато соломону драгое.
11 И сотвори соломон царь от древ певговых степени в дом Господень и в дом царев, и гусли и псалтири песней, и никогдаже видена быша в земли иудине прежде такоая.
12 Царь же соломон даде царице савстей вся по желанию ея, ихже просила, кроме всех яже принесе царю соломону, и возвратися в землю свою.
13 Бе же вес злата приносимаго к соломону на всяко лето шесть сот шестьдесят шесть талант злата,
14 кроме мужей подданных и купцов, иже приношаху, и всех царей аравских и властелей земли, иже вси приношаху злато и сребро царю соломону.
15 Сотвори убо царь соломон двести щитов златых тягненых, шесть сот златник чистых бяху во единем щите:
16 и триста щитов златых тягненых, по триста златник бяше во единем коемждо щите, и положи я царь в дому древа ливанова.
17 Сотвори же царь престол от слоновых зубов велик, и позлати его златом чистым,
18 и шесть степений у престола позлащени златом, и мышчицы две туду и сюду над престолом седалища, и два льва стояща близ мышчцей,
19 и дванадесять львов стоящих тамо на шести степенех от обоих стран: и не бысть таков престол во всяцем царстве.
20 Вси же сосуди царя соломона бяху златы, и вси сосуди дому дубравы ливанския златом окружены, сребро бо во днех соломоних ни во что вменяшеся:
21 зане корабль царев хождаше в фарсис с рабы хирамовыми, единицею в лета три прихождаше корабль от фарсиса ко царю, полн злата и сребра и зубов слоновых и обезян.
22 И возвеличися соломон паче всех царей земных богатством и мудростию.
23 Вси же царие земстии желаху видети лице соломоне и слышати премудрость его, юже даде Бог в сердце его:
24 и приношаху ему кийждо дары своя, сосуды сребряны и златы, и одеяния и стакту, и сладости, кони и мски, на всякое лето.
25 И бяху царю соломону четыредесять тысящ кобылиц к колесницы и дванадесять тысящ конник, и постави их во градех колесничных и со царем во Иерусалиме.
26 И быть вождь всех царей от реки (евфрата) даже до земли иноплеменник и даже до предел египетских.
27 И даде царь злато и сребро во Иерусалиме яко камение, и кедры яко черничие, еже (раждается) в полях множество.
28 И приводяху кони соломону от египта и от всея земли.
29 И прочая словеса соломоня первая и последняя, се, сия писана суть в словесех нафана пророка и в словесех ахии силониты и в видениих иоиля видящаго, противу иеровоама сына наватова.
30 И царствова соломон во Иерусалиме над всем израилем четыредесять лет.
31 И успе соломон со отцы своими, и погребоша его во граде давида отца его. И воцарися ровоам сын его вместо его.