Приложение 12. Из Триоди Постной

Подготовительный период к великому посту.

Неделя мытаря и фарисея.

Первая стихира на «Господи воззвах».

Не помолимся фарисейски, брате: ибо возносяй себе смирится. Смирим себе пред Богом, мытарски пощением зовуще: очисти ны, Боже, грешныя.

На полиелее после «Воскресение Христово видевше» и 50 псалма.

Слава, глас 8. Покаяния отверзи ми двери, Жизнодавче, утренюет бо дух мой ко храму святому Твоему, храм носяй телесный весь осквернен: но яко щедр, очисти благоутробною Твоею милостию.

И ныне, богородичен. На спасения стези настави мя, Богородице, студными бо окалях душу грехми, и в лености все житие мое иждих: но Твоими молитвами избави мя от всякия нечистоты.

Помилуй мя Боже, по велицей милости Твоей, и по множеству щедрот Твоих очисти беззаконие мое.

Множества содеянных мною лютых, помышляя окаянный, трепещу страшного дне суднаго: но надеяся на милость благоутробия Твоего, яко Давид вопию Ти: помилуй мя, Боже, по велицей Твоем милости.

Канон. Песнь 5.

Фарисеевы добродетели потщимся подражати, и поревновати мытареву смирению, во обою ненавидяще безместное мнение, и пагубу падений.

Стихи перед синаксарием:

Зиждителю горних и дольних, Трисвятую песнь от ангелов: трипеснец же и от человеков приими.

Фарисейски кто живет, церкви далече бывает: Христос бо внутрь, от смирения приемлемый.

Неделя о блудном сыне.

Псалом 136 «На реках Вавилонских»

На реках Вавилонских, тамо седохом и плакахом, внегда помянути нам Сиона. На вербиих посреде его обесихом органы наша. Яко тамо вопросиша ны пленшии нас о словесех песней и ведшии нас о пении: воспойте нам от песней Сионских. Како воспоем песнь Господню на земли чуждей? Аще забуду тебе, Иерусалиме, забвена буди десница моя. Прильпни язык мой гортани моему, аще не помяну тебе, аще не предложу Иерусалима, яко в начале веселия моего. Помяни, Господи, сыны Едомския, в день Иерусалимль глаголющия: истощайте, истощайте до оснований его. Дщи Вавилоня окаянная, блажен иже воздаст тебе воздаяние твое, еже воздала еси нам. Блажен иже имет и разбиет младенцы Твоя о камень.

Седален после 3-й песни канона.

Объятия Отча отверсти ми потщися, блудно иждих мое житие, на богатство неиждиваемое взираяй щедрот Твоих, Спасе, ныне обнищавшее мое сердце не презри. Тебе бо, Господи, во умилении зову: согреших, Отче, на небо и пред Тобою.

Кондак.

Отеческия славы Твоея удалихся безумно, в злых расточив, еже ми предал еси, богатство. Темже Ти блуднаго глас приношу: согреших пред Тобою, Отче Щедрый, приимя кающася, и сотвори мя, яко единаго от наемник Твоих.

Суббота Мясопусная (Вселенская родительская суббота)

Из канона.

Песнь 1.

Глубиною судеб Твоих, Христе, всепремудре Ты преопределил еси коегождо кончину жизни, предел и образ. Темже яже покры гроб во всякой стране, на суде спаси, Всещедрый.

Яже покры вода, и брань пожать, трус же яже об`ят, и убийцы убиша, и огнь яже попали, верныя, милостивее в части учини праведных.

Песнь 5.

Всех яже создал еси полезная ведый, имже попустил еси Господи, внезапными падежьми ненадежно умрети, избави муки всякия, Боже наш.

Песнь 7.

Внезапу благочестно умерши, и от стремнины всяческия падшыя, древа, железа, всякаго камене, упокой Боже усопшыя верныя.

Неделя мясопустная.

Кондак.

Егда приидиши, Боже, на землю со славою, и трепещут всяческая: река же огненная пред судищем течет, книги разгибаются, и тайная являются: тогда избави мя от огня неугасимаго и сподоби мя одесную Тебе стати, Судие Праведнейший.

Седален по 3-й песни канона.

Изгнан бысть Адам от райския сладости снедию горькою, в невоздержании заповеди не сохрани Владычни, и осудися делати землю, от неяже взят бысть сам, помтом же многим ясти хлеб свой. Темже мы возлюбим воздержание, да не вне рая возрыдаем, якоже он, но в него внидем.

Катавасия недели Мясопустной (Ирмосы Великого канона св. Андрея Критского)

Песнь 1. Помощник и Покровитель бысть мне во спасение, Сей мой Бог, и прославлю Его, Бог Отца моего, и вознесу Его: славно бо прославися.

Песнь 2. Вонми, небо, и воглаголю, и воспою Христа, от Девы плотию пришедшаго.

Песнь 3. Утверди Господи, на камени заповедей Твоих подвигшееся сердце мое, яко един свят еси и Господь.

Песнь 4. Услыша пророк пришествие Твое, Господи, и убояхся, яко хощеши от Девы родитеся и человеком явитися и глаголаше: услыша слух Твой и убояхся, слава силе твоей, Господи.

Песнь 5. От нощи утренююща, Человеколюбче, провсети, молюся, и настави и мене на повеления Твоя, и научи мя, Спасе, творити волю Твою.

Песнь 6. Возопих всем сердцем моим к щедрому Богу, и услыша мя от ада преисподняго и возведе от тли живот мой.

Кондак.

Душе моя, душе моя, востани, что спиши; конец приближаетсяи имаши смутитися: воспряни убо, да пощадит тя христос Бог, везде сый, и вся исполняяй.

Песнь 7. Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже зоповедал еси нам: но не предаждь нас до конца, отцев Боже.

Песнь 8. Егоже воинства небесная славят и трепещут херувимы и серафимы, всяко и дыхание тварь, пойте, благословите и превозносите во вся веки.

Песнь 8. Бессеменаго зачатия Рождество несказанное, Матери безмужния нетленен Плод: Божие бо рождение обновляет естства. Темже Тя вси роди, яко Богоневестную Матерь, православно величаем.

Сырная седмица.

Понедельник сырный.

Утреня. Седален.

Отверзоша Божественнаго покаяния преддверия: приступим усердно, очистившее телеса, брашен и страстей отложения творяще, яко послушницы Христа, призвавшаго мир в Царствие Небесное, десятины всего лета приносящее всех Царю, яко да и воскресение Его любовию узрим.

Из первого трипеснца. Песнь 1.

Светлая предпразднства воздержания, светлая предпутия поста днесь, темже стецемся в надежде братие, и усердии мнозем; житие мое все блудно иждив, гражданом работах горьким и лукавым: но желающа мя к твоим щедротам ныне обратитися Христе, не презри).

Начало умиления и покаяния, злых отчуждение, и старестей воздержание. Темже потщимся отсечение лукавых дел сотворити.

Из второго трипеснца. Песнь 8.

Сие есть время покаяния, темже благомудренно начнем, братие, вопиюще: благословите дела Господня Господа.

Молитва св. Ефрема Сирина.

Господи и Владыко живота моего, дух праздности, уныния, любоначалия и празднословия не даждь ми.

Дух же целомудрия, смиренномудрия, терпения и любве даруй ми, рабу Твоему.

Ей, Господи Царю, даруй ми зрети моя прегрешения и не осуждать брата моего, яка благословен еси во веки веков. Аминь.

Неделя сыропустная. Изгнание Адамово.

Стихиры на «Господи воззвах».

Адам изгнан бысть из рая преслушанием, и сладости извержен, женскими глаголы прельщенный, и наг седит, села, увы мне, прямо рыдая. Темже потщимся вси время подъяти поста, послушающе Евангельских преданий: да сими благоугодни бывше Христу, рая жилище паки восприимем.

Седе Адам прямо рая, и свою наготу рыдая плакаше: увы мне, прелестию лукавою увещанну бывшу и окрадену и славы удалену! Увы мне, простотою нагу, ныне же недоуменну! Но о раю, ктому твоея сладости не наслаждуся: ктому не узрю Господа и Бога моего и Создателя: в землю бо пойду, от неяже и взят бых. Милостиве щедрый, вопию Ти: помилуй мя падшаго.

Стихира ни стиховне.

Изгнан бысть Адам из рая снедию, темже и седя прямо сего рыдаше, стеня умилительным гласом, и глаголаше: увы мне, что пострадах окаянный аз: едину заповедь преступих Владычню, и благих всяческих лишихся! Раю святейший, мене ради насажденный быв, и Евы ради затворенный, моли тебе сотворшаго, и мене создавшаго, яко да твоих цветов исполнюся! Темже и к нему Спас: Моему созданию не хощу погибнути, но хощу сему спастися, и в познание истины приити, яко грядущаго ко Мне не изгоняю вон.

Святая четыредесятница.

Первая седмица Великого поста.

Понедельник.

Вечерня. Стихира на стиховне.

Постимся постом приятным, благоугодным Господеви: истинный бо пост есть, злых отчуждение, воздержание языка, ярости отложение, похотей отлучение, оглаголания, лжи и клятвопреступления. Сих оскудение, пост истинный есть и благопричтный.

Неделя первая Великого поста. Торжество Православия.

Тропарь. Пречистому образу Твоему покланяемся Благий, просяще прощения прегрешений наших Христе Боже: волею бо благоволил еси плотию взыти на Крест, да избавиши, яже создал еси, от работы вражия.

Тем благодарственно вопием Ти: радости исполнил еси вся Спасе наш, пришедый спасти мир.

Кондак. Неописанное Слово Отчее, из Тебе Богородице описася воплощаемь: и оскверншийся образ в древнее вообразив, Божественною добротою смеси. Но исповедающе спасение, делом и словом, сие воображаем.

Неделя вторая Великого поста. Память свт. Григория Паламы.

Тропарь. Православия светильниче, Церкве утверждение и учителю, монахов доброто, богословов поборниче непреборимый, Григорие чудотворче, Фессалонитская похвало, проповедниче благодати, молися выну спастися душам нашим.

Премудрости священный и Божественный орган, богословия светлую согласно трубу, воспеваем тя Григорие богоглагольниче: но яко ум Уму первому предстояй, к Нему ум наш отче настави, да зовем: радуйся проповедниче благодати.

Стихи перед синаксарием:

Света светлаго проповедника ныне воистинну велия,

Источник света, к Незаходимому водит Свету.

Неделя Третья Великого поста. Крестопоклонная.

Тропарь. Спаси Господи люди Твоя, и благослови достояние Твое, победы православным христианом на сопротивныя даруя, и Твое сохраняя Крестом Твоим жительство.

Кондак. Не ктому пламенное оружие хранит врат Едемских: на тыя [тех] бо найде преславный соуз Древо крестное, смертное жало, и адова победа прогнася. Предстал бо еси Спасе мой, вопия сущим во аде: внидите паки в рай.

Стихиры при поклонении Кресту на утрене.

Приидите вернии, животворящему Древу поклонимся, на немже Христос Царь славы волею руце распростер, вознесе нас на первое блаженство, ихже прежде сластию украд враг, изгнаны от Бога сотвори. Приидите вернии, Древу поклонимся, имже сподобихомся невидимых враг сокрушити главы. Приидите вся отечествия язык, Крест Господень песньми почтим: радуйся Кресте, падшаго Адама совершенное избавление! О тебе вернии хвалятся, яко твоею силою исмаильтеския люди державно покаряющии. Тебе ныне со страхом христиане целуем: на тебе пригвоздившагося Бога славим, глаголюще: Господи на том пригвоздивыйся помилуй нас, яко Благ и Человеколюбец.

Днесь Владыка твари, и Господь славы, на Кресте пригвождается и в ребра прободается, желчи и оцта вкушает, сладость церковная: венцем от терния облагается: покрываяй небо облаки, одеждею облачится поругания: и заушается бренною рукою, рукою создавый человека. По плещема биен бывает, одеваяй небо облаки. Заплевания и раны приемлет, поношения и заушения: и вся терпит мене ради осужденнаго, Избавитель мой и Бог, да спасет мир от прелести, яко благоутробен.

Днесь Неприкосновенный существом, прикосновен мне бывает, и страждет страсти, свобождаяй мя от страстей. Свет подаваяй слепым, от беззаконных устен оплевается, и дает плещи за плененныя на раны. Сего Чистая Дева и Мати на Кресте зрящи, болезненно вещаше: увы мне Чадо Мое, что сие сотворил еси? Красный добротою паче всех человек, бездыханный, беззрачный являешися, не имея вида, ниже доброты. Увы Мне Мой Свете! Не могу спяща зрети Тя, утробою уязвляюся, и лютое оружие сердце Мое проходит. Воспеваю Твоя страсти, покланяюся благоутробию Твоему, долготерпеливе слава Тебе.

Неделя Четвертая Великого поста. Память прп. Иоанна Лествичника.

Тропарь. Пустынный житель и в телеси ангел, и чудотворец явился еси Богоносе отче наш Иоанне: постом, бдением, молитвою небесная дарования приим, исцеляеши недужныя, и души верою притекающих ти. Слава Давшему ти крепость: слава Венчавшему тя: слава Действующему тобою всем исцеления.

Кондак. На высоте Господь воздержания истинна тя положи, якоже звезду нелестную, световодящую концы, наставниче Иоанне отче наш.

Стихи перед синаксарием.

Иже плотию и живый, мертв сый Иоанн,

Вечно живет, и мертв явлься бездыханный:

Списание оставль лествицу восхождения,

Показует своего путь восхождения.

Среда пятой седмицы. Стояние прп. Марии Египетской.

Из 24-х стихир на «Господи воззвах» прп. Андрея Критского.

Согреших, согреших, преступив повеления Твоя Христе Боже, милостив буди ми Благодетелю, да прозрю внутреннима очима, и убегну тьмы, и со страхом возопию: Господи, прежде даже до конца не погибну, спаси мя.

Сокрыв талант данный ми, яко несмысленный раб в землю закопах: ибо якоже непотребный осудихся, и не дерзаю прочее просити Тя, яко незлобивый ущедри мя, да и аз воззову: Господи, прежде даже до конца не погибну, спаси мя.

Скверну очисти души моея, мене ради обнищавый, и младенствовавый плотию, каплю милости Твоея низпослав, немощному и окаянному Христе: омый от скверны, уврачуй недугующа: Господи, прежде даже до конца не погибну, спаси мя.

Утверди Владыко душу мою, к Тебе притекати, и Тебе работати присно: покров бо мой еси и хранитель, и заступление и помощь, сподоби Божий Слове, вопити мне в дерзновении: Господи, прежде даже до конца не погибну, спаси мя.

Руку ми простри яко Петрови, и возведи из глубины Боже, благодать и милость ми подаждь, молитвами Всенепорочныя Матере, Тебе рождшия безсеменно, и святых Твоих всех: Господи, прежде даже до конца не погибну, спаси мя.

Суббота пятой седмицы. Похвала Богородице (Суббота Акафиста)

Тропарь. Повеленное тайно прием в разуме, в крове Иосифове тщанием предста безплотный, глаголя Неискусобрачней: Приклонивый схождением небеса, вмещается неизменно весь в Тя. Егоже и видя в ложеснах Твоих приемша рабий зрак, ужасаюся звати Тебе: радуйся Невесто Неневестная.

Пятая неделя Великого поста. Память прп. Марии Египетской.

Тропарь. В тебе мати известно спасеся еже по образу: приимши бо крест, последовала еси Христу и деющи учила еси: презирати убо плоть, преходит бо, прилежати же о души вещи безсмертней. Темже и со ангелы срадуется, преподобная Марие, дух твой.

Кондак. Блудами первее преисполнена всяческими, Христова невеста днесь покаянием явися, ангельское жительство подражающи, демоны Креста оружием погубляет. Сего ради Царствия невеста явилася еси Марие преславная.

Икос. Агницу Христову и дщерь песньми восхвалим ныне, Марию приснопамятную, явльшуюся Египетское овча: и прелести сих всея избеже, и едина принесеся Церкви совершенное возращение, воздержанием и молитвою подвизающися паче меры человеческаго естества. Темже и возвыси ея и житие и деяние, един Вседержитель, Марии преславныя.

Шестая седмица Великого поста (седмица ваий)

Понедельник.

Второй трипеснец. Песнь 8.

Днесь Христу является, об ону страну Иордана ходящу, болезнь Лазарева, и яко провидец, глаголет: болезнь сия несть ныне к смерти.

Стихира на «Господи воззвах»

Немилосердному богатому в безумии поревновав, сладостно веселюся, сластьми и страстьми погружаяся. И видя лежаща всегда пред дверьми покаяния, якоже Лазаря ума моего, Господи, сего нечувственно прехожду, гладом же болезнующа, и острупляема страстьми. Темже геенскому повинен есмь пламени, от негоже избави мя, Владыка, Едине Многомилостиве.

Вторник.

Седален по 3-й кафизме.

Вчера и днесь болезнь Лазарева, сию бо Христу являют сродницы. Радостию Вифания уготовися, Жизнодавца угостити и Царя, с нами вопиющи: Господи, слава Тебе.

Первый Трипеснец. Песнь 2.

Отроки обострив сильнейшия огня, иногда в Вавилоне содела пост: тем поревновавши, о душе моя, не унывай, и огнь сладострастий духа угасиши росою.

Второй трипесней. Песнь 2.

Рыданием обложившеся лазаревы сестры, страсть Тебе, Ведетелю всех, являют: но пребываеши мало, да воздвигнеши чудо, и покажеши учеником твоим страшная.

Песнь 8.

Лазарь болезнует, да Ты прославишися, Сыне Божий о нем: и поют Тя непрестанно дела вся, Господа.

Стихира на «Господи воззвах»

Днесь издше [умер] Лазарь, и рыдает сего Вифания, егоже, Спасе наш, воздвизаеши от мертвых и предуверяеши другом Твоим, воскресения Твоего страшное, адово умерщвление, и адамово оживление: сего ради поем Тя.

Среда.

Седален по 3-й кафизме.

Днесь Лазарь умерый погребается, и рыдание поют его сродницы, якоже Провидец и Бог, страсть предрекл еси: Лазарь успе, учеником провещая, но ныне иду воскресити егоже создах. Сего ради Тебе вси вопием: слава державе крепости Твоея.

Первый трипеснец. Песнь 8.

Во Иудею паки, Христе, грядеши, ищущую жизни Тя древо, древом убити, желая обезсмертити умерщвленныя древа снедию. [Во Иудею, ищущую тебя, Древо жизни, древом убить, Ты, Христе, идешь, чтобы обессмертить умерщвленных вкушением запретного плода].

Стихира на «Господи воззвах»

Двоеденствует Лазарь во гробе, сущия от века видит умершия, тамо зрит страхи странныя, множество неисчетное адовыми держимое узами: темже сродницы рыдают горько, предвидяше гроб его. Христос же идет оживити друга своего, едино от всех совершити согласие: благословен еси, Спасе, помилуй нас.

Пятница.

Стихира на «Господи воззвах»

Душеполезную совершивши четыредесятницу, и Святую седмицу Страсти Твоея, просим видети, человеколюбе, еже [чтобы] прославити в ней величия Твоя, и неизреченное нас ради смотрение Твое, единомудренно воспевающе: Господи, слава Тебе.

Суббота святого и праведного Лазаря.

Тропарь на «Бог Господь»

Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы, яко отроковицы знамение победы носяще, Тебе, победителю смерти вопием: осанна в вышних, благословен Грядый во имя Господне.

Первый канон, песнь 3.

Два предлагая Действа Твоя, показал еси существ Спасе сугубство: Бог бо еси и человек.

Второй канон.

Плотию описан сый, Неописанный, в Вифанию пришед, яко человек Владыко слезиши над Лазарем, яко Бог же хотя воскрешаеши четверодневнаго.

Синаксарий.

Рыдаеши Ииусе, смертнаго существа [это от смертного человеческого естества]:

Оживляеши друга Твоего, сие Божественныя крепости.

Ексапостиларий.

Лазарем тя Христос уже разрушает, смерте, и где твоя, аде, победа; в Вифании плач ныне на тебе представляется, вси ветви победы тому принесем. (См. 1 Кор. 15:55 «Смерть! где твое жало? ад! где твоя победа?»)

Стихира на «Господи воззвах» Эта вечерня относится уже к праздничному Всенощному бдению. Стихира поется 4 раза и потом еще трижды (два раза на стиховне и по 50-м псалме на утрене).

Днесь благодать Святаго Духа нас собра, и вси, вземше Крест Твой, глаголем: благословен Грядый во имя Господне, осанна в вышних.

Неделя ваий. Вход Господень в Иерусалим.

Тропарь 1.

Общее воскресение… (см. Лазареву субботу)

Тропарь 2.

Спогребшеся Тебе крещением, Христе Боже наш, бессмертныя жизни сподобихомся воскресением Твоим, и воспевающе зовем: осанна в вышних, благословен Грядый во имя Господне.

Стихиры на стиховне.

От ветвей и ваий, яко от Божественна праздника, в Божественный прешедше праздник, к честному Христовых Страстей, вернии, стецемся, таинству спасительному: и Сего видим за нас страсть терпяща вольную, Тому же пение подобное благодаряще воспоим, умильно зовуще: благоутробия Источниче, и спасения Пристанище, Господи, слава Тебе. (2 раза)

Страшно еже впасть в руце Бога Жива: сей Судия есть помышлений и мыслей сердечных. Никтоже да внидет искушаяй веру непорочную: но в кротости и страсе Христу приступим, да приимем милость, и благодать обрящем, во благовременную помощь (2 раза).

Отпуст.

Грядый на вольную страсть нашего ради спасения, Христос истинный Бог наш…

Страстная седмица.

Великий Понедельник.

Тропарь на «Бог Господь»

Се Жених грядет в полунощи, и блажен раб, егоже обрящет бдяща: недостоин же паки, егоже обрящет унывающа. Блюди убо, душе моя, не сном отяготися, да не смерти предана будеши, и Царствия вне затворишися, но воспряни зовущи: Свят, Свят, Свят еси, Боже, Богородицею помилуй нас.

Кондак: Иаков рыдаше Иосифова лишения, и доблий седяше на колеснице [а тот, доблестный, восседал не колеснице], яко царь почитаемь: египтяныни бо тогда сластем не поработав, воспрославляшеся от Ведущаго человеческия сердца, и Посылающаго венец нетленный.

Икос: На рыдание ныне приложим рыдание, и излием слезы со Иаковом, плачущеся Иосифа приснопамятнаго и целомудреннаго, порабощеннаго убо телом, душу же непорабощену соблюдшаго, и Египтом всем царствовавшаго: Бог бо подает рабом Своим венец нетленный».

Из синаксария. Обаче от отец смоковничная повесть зде умиления ради положися, якоже Иосифа ради, за еже носить образ Христов. Есть же смоковница всяка душа, всякаго духовнаго плода непричастна: в ней же утру, по настоящей яве жизни, не обретая Господь покоя у нея, иссушает ю клятвою, и в вечный посылает огонь, и столп некий стоит усушемнный, устрашаяй не делающих прикладнаго добродетелей плода.

Великий Вторник.

Седален по 1-й кафизме.

Жениха, братие, возлюбим, свещи своя украсим, в добродетелех сияюще и вере правой: да яко мудрыя Господни девы, готови внидем с Ни на браки: Жених бо дары, яко Бог, всем подает нетленный венец.

Кондак. Час конца помысливши, и посечения смоковницы убоявшися, данный тебе талант трудолюбно делай, окаянная, бодрствующи и зовущи: да не пребудем вне чертога Христова.

Икос. Что унываеши, душе моя окаянная; что мечтаеши безвременно попечения неполезная; что упражняешися к мимотекущим; последнейший час есть отселе, и разлучитися имамы от сущих зде. Дондеже время имаши, возникни, зовущи: согреших Ти, Спасе мой, не посеци мене, якоже неплодную смоковницу, но яко благоутробен, Господи, ущедри со страхом зовущую: да не пребуду вне чертога Христова.

Двупеснец, песнь 8.

Леность далече нас отвержим, и светлыми свещами безсмертнаго Жениха Христа пением усрящим, благословите, вопиюще, дела Господня Господа.

Великая Среда.

Седален по 1-й кафизме.

Блудница приступи к Тебе, миро со слезами изливающи на нозе Твои, Человеколюбче, и смрада зол избавляется повелением Твоим: дыша же благодать Твою ученик неблагодарный, сию отдает, смрадом одевается, сребролюбием продая Тебе, Слава, Христе, благоутробию Твоему!»

Стихиры на хвалитех.

Егда грешная приношаше миро, тогда ученик соглашашеся пребеззаконным. Овая убо радовашеся, истощающи миро многоценное: сей же тщащеся продати безценнаго. Сия Владыку познаваше, а сей владыки разлучашеся. Сия свобождашеся, а Иуда раб бываше врагу. Люто есть леность, велие покаяние: еже мне даруй, Спасе, пострадавый о нас, и спаси нас.

Великий Четверг Канон св. Косьмы Маюмского «Сеченое сечеся»

Песнь 1.

Ирмос. Сеченое сечется [под ударом жезла расступается] море Чермноме, волнопитаемая [питающая, то есть вздымающая волны] же изсушается глубина, таяжде [она] купно безоружным бывши проходима и всеоружным [вооруженным] гроб. Песнь же богокрасная воспевашеся: славно прославися Христос Бог наш.

Всевиновная и подательная [Причина и Податель] жизни, безсмертная Мудрость Божия, созда храм Себе от чистыя неискусномужныя Матере: во храм бо телесный оболкийся, славно прославися Христос Бог наш.

Тайноводящи [посвящая в таинства] други своя, душепитательную уготовляет трапезу, безсмертия же воистинну Мудрость Божия растворяет Чашу верным. Приступим благочестно и возопиим: славно прославися Христос Бог наш.

Услышим вси вернии, созывающую высоким проповеданием, несозданную и естественную Премудрость Божию, вопиет бо: вкусите и разумейте, яко Христос Аз, возопийте: славно прославися Христос Бог наш.

Песнь 3.

Ирмос. Господь сый всех и Зиждитель, Бог созданное безстрастный обнищав Себе соедини, и Пасха за еже хотяше умрети Сам Себе сый [будучи Сам Пасхой для тех, за кого готовился умереть], Себе предпожре [заранее предлагал Себя в снедь]]: ядите, вопия тело Мое и верою утвердитеся.

Избавительною всего рода человеча, Твоею, Блаже, Твоя ученики напоил еси веселия Чашею, наполнив ю, Сам бо Себе священнодействуеши, пийте, вопия, Кровь мою, и верою утвердитеся.

Безумный муж, иже в вас предатель, учеником Своим предрекл еси Незлобиве, не уразумеет сих, и той несмыслен сый не имать разумети. Обаче во Мне пребудите и верою утвердитеся.

Седален. Езера и источники и моря Сотворивый, смирению нас наказуя изрядному, лентием опоясався, учеников ноги умы, смиряяся премножеством благоутробия, и возвышая нас от пропастей злобы, един Человеколюбец.

Слава. Смиряяся за благоутробие, ноги умыл еси учеников Твоих, и к течению Божественному Сия направил еси: не повинуяся же Петр умытися, абие Божественному повинуется повелению, омываем, и Тебе прилежно моляся, даровати нам велию Милость.

И ныне. Ядый Владыко со ученики Твоими, Таинственно явил еси всесвятое Твое заколение, имже тли избавихомся, честная Твоя почитающи стрдания.

Песнь 4.

Ирмос. Провидев пророк тайну Твою неизреченную, Христе, провозгласи: положил еси твердую любовь крепости, Отче Щедрый: Единороднаго бо Сына, Благий, очищение в мир послал еси.

На страсть всем сущим из Адама источившую безстрастие, Христе грядый, другом Твоим рекл еси: с вами Пасхи сея причаститеся возжелах: Единороднаго бо Мя очищение Отец в мир послал есть.

Причащаяся чаши, учеником вопиял еси Безсмертне: плода лознаго ктому не пию прочее, с вами живя: Единороднаго бо Мя очищение Отец в мир послал есть.

Питие новое паче слова [превыше разума], аз глаголю, во Царствии Моем, Христос другом, пию, якоже бо Бог с вами боги буду [когда буду там вместе с вами как Бог с богами по благодати], рекл еси: Единороднаго бо Мя очищение Отец в мир послал есть.

Песнь 5.

Ирмос. Союзом любве связуеми апостоли, Владычествущему всеми себе Христу возложше [предав себя Христу], красны ноги очищах [приняли от Него омовение прекрасных ног] благовествуще всем мир [чтобы идти проповедовать всем мир].

Неудержимую держащая, и превыспреннюю [поднебесную] на воздусе воду, бездны обуздовамющая [обуздывающая], и моря востязующая [укрощающая] Божия Премудрость, воду в умывальницу вливает, ноги же умывает рабов Владыка.

Учеником показует смирения образ Владыка, облаки облагаяй небо [Покрывающий небо облаками], препоясуется лентием, и приклоняет колена, рабом омыти ноги, в Егоже руце [Тот, в руке Которого] дыхание всех сущих.

Песнь 6.

Ирмос. Бездна грехов обыдет мя, и волнения не ктому терпя [не вынося более], яко Иона Владыце вопию Ти: от тли мя возведи.

Господа глашаете Мя, о ученицым, и Учителя: Есмь бо, Спасе вопиял еси. Темже подражайте образ, егоже во Мне видесте.

Скверны кто не имея, омыти не требует ног: чисти же, о ученицым вы, но ни вси: мгновением бо бесчинно един от вас неистовствует.

Кондак. Хлеб прием в руце предатель, соровенно тыя простирает, и приемлет цену Создавшаго Своима рукама человека, и неисправлен пребысть Иуда раб и льстец.

Икос: Тайной трапезе, в страсе приближившеся вси, чистыми душами Хлеб приимем, спребывающе Владыце; да видим, како умывает ноги учеников, и сотворим, якоже видим, друг другу покаряющеся, и друг другу нозе умывающе, Христос бо тако повеле своим учеником, предрек тако творити; но не услыша Иуда раб и льстец.

Песнь 7.

Ирмос. Отроцы в Вавилоне пещнаго пламене не убояшая, но посреди пламене ввержени, орошаеми пояху: благословен еси Господи Боже отец наших.

Помявая [кивая] главою Иуда злая предзрев подвиже [расчетливо сделал зло], благовремение иский [ища удобного времени] предати Судию на осуждение, Иже всех Господь и Бог отец наших.

Вам Христос другом вопияше: един предаст Мя, [они же] веселия забывше, скорбию и страхом одержими бяху: кто сей, скажи, глаголюще, Боже отец наших;

Иже со мною руку свою в солило вложит дерзостию, тому обаче добро бы врата жития пройти никогдаже: сего, иже предатель, являше Бог отец наших.

Песнь 8.

Ирмос. За законы отеческия блажении в Вавилоне юноши предбедствующе [находились в бедстви], царюющаго [царствующего] оплеваша повеление безумное, и совокуплени иже не сваришася огнем [охваченные огнем, который их не сжег], Державствующему достойную воспеваху песнь: Господа пойте дела, и превозносите во вся веки.

Собеседницы блажении, в Сионе Словом [блаженные собеседники Слова] претерпевше [предавшись Ему] апостоли последоваху пастырю, яко агнцы, и совокуплени, егоже не разлучишася Христа [и соединенные неразлучно со Христом], Божественным словом питаеми, благодарственно вопияху: Господа пойте дела, и превозносите во вся веки.

Законныя дружбы злоименитый Искариот волею забыв, яже нозе умы [те ноги, что были омыты], уготови на предание: и Твой ядый хлеб, Тело Божественное, воздвиже ков [злоумышление] на Тя Христе, и вопити не разуме: Господа пойте дела, и превозносите во вся веки.

Принимаше решительное греха [избавляющее от греха] Тело безсовестный, и Кровь изливаемую за мир Божественную, но не стыдяшеся пия, юже продаяше на цене [то, что продавал по цене], о злобе же не негодова [от злобы же не отвратился], и вопити не разуме: Господа пойте дела, и превозносите во вся веки.

Песнь 9.

Ирмос. Странствия [гостеприимства] Владычня и безсмертныя трапезы на горнем месте, высокими умы, вернии приидите насладимся, возшедша слова, от Слова научившася [высочайшее слово услышав от Самого Слова], Егоже величаем.

Идите, учеником Слово рече, Пасху на горничном месте, еюже ум утверждается, и сию тайноводительно уготовите, безквасным истинным словом, твердое [твердость, силу] же благодати величайте.

Содетельницу Отец прежде век Премудрость раждает Мя, Начаток путей, в делам созда ныне тайно совершаемая [Он создал Меня на дела, ныне тайно совершаемые]: Слово бо Несозданное сый естеством, гламсы присвояюся, егоже ныне приях [словами этими Я объявляю Своим то, что ныне восприял].

Яко человек Сый существом, не мечтанием [не призрачно], сице Бог нравом воздаяния, естество соединившееся Мне [так и, со Мною соединенное человеческое естество Божественно по образу взаимообщения]. Христа единаго тем Мя знайте [Поэтому познайте Мя, Единого Христа], от нихже, в нихже, яже Есмь, спасающа [спасающего то, из чего и чем Я соделался, то есть человека].

Великая Пятница.

Утреня с чтением 12-ти страстных Евангелий.

Антифон 15.

Днесь висит на древе, иже на водах землю Повесивый; венцем от терния облагается, иже Ангелов Царь; в ложную багряницу облачается, Одеваяй небо облаки; заушение прият, иже во Иордане Свободивый Адама; гвоздьми пригвоздися Жених Церковный; копием прободеся Сын Девы. Покланяемся Страстем Твоим, Христе; покланяемся Страстем Твоим, Христе; покланяемся Страстем Твоим, Христе; покажи нам и славное Твое Воскресение.

Трипеснец св. Косьмы Маюмского «К Тебе утренюю»

Песнь 5.

Ирмос. К Тебе утренюю, милосердия ради Себе истощившему непреложно, и до страстей безстрастно приклоншемуся Слове Божий, мир подаждь ми падшему, Человеколюбче.

Умывши ноги, и предочистившеся таинства причищением Божественнаго ныне Христе Твоего, служителие от Сиона на Елеонскую гору великую с Тобою взыдоша, поюще Тя, Человеколюбче.

Зрите, рекл еси, друзи, не бойтеся: ныне бо приближися час, яту Ми быти, и убиену рукама безаконных: вси расточитеся, Мене оставивше, ихже соберу проповедати Мя Человеколюбца.

Кондак. Нас ради распятаго, приидите, вси воспоим, Того бо виде Мария на древе, и глаголаше: аще и распятие терпиши, Тя еси Сын и Бог Мой.

Икос. Своего Агнца зрящи ко заколению влекома, последоваше Мария простертыми власы со инеми женами, сия вопиющи: камо имдеши, Чадо; чесо ради скорое течение совершаеши; еда другий брак паки есть в Кане Галилейстей, и тамо ныне тщишися, да от воды им вино сотвориши; иду ли с Тобою, Чадо, или паче пожду Тебе; даждь Ми слово, Слове, не молча мимоиди Мене, чисту соблюдый Мя: Ты бо еси Сын и Бог Мой.

Песнь 8.

Ирмос. Столп злобы богопротивныя, божествении отроцы обличиша: на Христа же шатающееся беззаконных соборище, советует тщетная, убити поучается, живот держащаго дланию: Егоже вся тварь благословит, славящи во веки.

От веждей [от очей] учеником ныне сон, рекл еси Христе, отрясите, в молитве же бдите, да не в напасть внидете, и наипаче Симоне, крепчайшему бо болий искус. Разумея Мя, Петре, Егоже вся тварь благословит, славящи во веки.

Скверна слова устен, никогдаже изреку Тебе, Владыко, с Тобою умру яко благоразумен, аще и вси отвергутся, возопи Петр. Ни плоть, ниже кровь, но Отец Твой откры ми Тя: Егоже вся тварь благословит, славящи во веки.

Глубину премудрости Божественныя и разума, не всю испытал еси, бездну же Моих судеб не постигл еси, человече, Господь рече. Плоть убо сый, не хвалися, трижды бо отвержешися Мене: Егоже вся тварь благословит, славящи во веки.

Отрицаешися, Симоне Петре, еже сотвориши скоро, якоже речеся, и к тебе отроковица едина прешедши устрашит тя, Господь рече. Горце прослезив, обрящеши Мя обаче милостива: Егоже вся тварь благословит, славящи во веки.

Песнь 9.

Ирмос. Честнейшую херувим и Славнейшую без сравнения серафим, без истления [оставшись Девой] Бога слова Рождшую, сущую Богородицу Тя величаем.

Пагубное соборище богомерзких, лукавнующих богоубийц сонмище, предста, Христе, Тебе, и яко неправедника влечаше Зиждителя всех, Егоже величаем.

Закона не разумеюще нечестивии, гласом пророческим поучающеся вотще [напрасно изучавшие слова пророков], яко овча влечаху тя, всех Владыку, неправедно заклати, Егоже величаем.

Язымком изданную Жизнь [данную народам Жизнь], с книжники убити священницы предаху, уязвлени сомозавистою злобою, естеством Животодавца [священники с книжниками предали на убиение Того, Кто по Своему естеству есть Подающий жизнь], Егоже величаем.

Обыдоша яко пси мнози, и удариша, Царю, ланиту Твою заушением, вопрошаху Тя: Тебе ложно свидетельствовах: и вся [всё] претерпев, всех спасл еси.

Вечерня (с выносом Плащаницы)

Стихиры на «Господи воззвах»

Вся тварь изменяшеся страхом, зрящи Тя на Кресте висима, Христе: солнце омрачашеся, и земли основания сотрясахуся, вся сострадаху Создавшему вся. Волею нас ради претерпевый Господи, слава Тебе. (Дважды.)

Днесь Владыка твари предстоит Пилату, и кресту предается Зиждитель всех, яко агнец приводимь Своею волею: гвоздьми пригвождается, и в ребра прободается, и губою напояется манну одождивый, по ланите заушается Избавитель мира, и от Своих раб поругается Создатель всех. О Владычняго Человеколюбия! О распинающих моляше Своего Отца, глаголя: Отче, остави им грех сей: не ведят бо беззаконнии, что неправедное содевают.

Стихиры на стиховне.

Егда во гробе нове за всех положился еси, Избавителю всех, ад всесмехливый, видев Тя, ужасеся, вереи сокрушишася, сломишася врата, гроби отверзошася, мертвии восташа, тогда Адам, благодарственно радуяся, вопняше Тебе: слава снизхождению Твоему, Человеколюбче.

Тебе, одеющагося светом яко ризою, снем Иосиф с древа с Никодимом, и видев мертва нага непогребена, благосердный плач восприим, рыдая глаголаше: увы мне сладчайший Иисусе, Егоже вмале солнце на кресте висима узревшее мраком облагашеся, и земля страхом колебашеся, и раздирашеся церковная завеса: но се ныне вижу Тя, мене ради волею подъемша смерть. Како погребу Тя, Боже мой, или какою плащаницею обвию; коима ли рукама прикоснуся нетленному Твоему телу, или кия песни воспою Твоему Исходу. Щедрее, величаю Страсти Твоя, песнословлю и погребение Твое со воскресением, зовый: Господи, слава Тебе.

Повечерие. Канон Симеона Логофета о распятии Господни и на плач Пресвятыя Богородицы.

Песнь 1.

Ирмос: Яко по суху пешешествовав Израиль по бездне стопами, гонителя фараона видя потопляема. Богу победную песнь поим, вопияше.

Обешена яко виде на Кресте, Сына и Господа, Девая Чистая, терзающися, вопияше горце, со другими женами, стенящи, глаголаше.

Вижу Тя ныне, возлюбленное Мое Чадо и любимое, на Кресте висяща, и уязвляюся горце сердцем, рече Чистая: но даждь слово, Благий, Рабе Твоей.

Слава: Волею, Сыне Мой и Творче, терпиши на древе лютую смерть, Дева глаголаше, предстоящи у Креста со возлюбленным учеником.

И ныне: Ныне Моего чаяния, радости и веселия, Сына Моего и Господа лишена бых: увы Мне, болезную сердцем, Чистая, плачущи, глаголаше.

Песнь 3.

Ирмос: Несть свят якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Страха ради иудейска Петр скрыся, и вси отбегоша вернии, оставльше Христа, Дева, рыдающи, глаголаше.

О страшном Твоем рождестве и странном, Сыне Мой, паче всех матерей возвеличена бых Аз: но увы Мне, ныне Тя видящи на древе, распалаюся утробою.

Слава: Вижу утробу Мою на руках, в нихже Младенца держах, с древа прияти, вещаше Чистая: но никтоже, увы Мне, Сего даде.

И ныне: Се Свет Мой, сладкий, Надежда и Живот Мой Благий, Бог Мой угасе на Кресте, распалаюся утробою, Дева, стенющи, глаголаше.

Песнь 4.

Ирмос: Христос моя сила. Бог и Господь, честная Церковь боголепно поет взывающи, от смысла чиста о Господе празднующи.

Солнце не заходяй, Боже Превечный и Творче всех тварей Господи, како терпиши страсть на Кресте? Чистая, плачущи, глаголаше.

Плачущи, глаголаше Браконеискусная ко благообразному: потщися, Иосифе, к Пилату приступити и испроси сняти со древа Учителя Твоего.

Слава: Видев Пречистую горце слезящу, Иосиф смутися и, плачася, приступи к Пилату: даждь ми, вопия с плачем, Тело Бога моего.

И ныне: Уязвена Тя видящи, и без славы, нага на древе, Чадо Мое, утробою распалаюся, рыдающи яко Мати, Дева провещаваше.

Песнь 5.

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, Истиннаго Бога, от мрака греховнаго взывающа.

Растерзаяся и рыдая, и дивяся вкупе с Никодимом, снят Иосиф, и уцеловав Пречистое Тело, рыдаше и стеняше, и поя Его яко Бога.

Приимши Его с плачем Мати неискусомужная, положи на колену, молящи Его со слезами и облобызающи, горце же рыдающи и восклицающи.

Слава: Едину Надежду и Живот, Владыко, Сыне Мой и Боже, во очию свет Раба Твоя имех, ныне же лишена бых Тебе, сладкое Мое Чадо и любимое.

И ныне: Болезни и скорби, и воздыхания обретоша Мя, увы Мне, Чистая, горце рыдающи, глаголаше, видящи Тя, Чадо Мое возлюбленное, нага и уединена, и вонями помазана мертвеца.

Песнь 6.

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Мертва Тя зрю, Человеколюбче, оживившаго мертвыя, и содержаща вся, уязвляюся люто утробою. Хотела бых с Тобою умрети, Пречистая глаголаше: не терплю бо без дыхания мертва Тя видети.

Дивлюся, зрящи Тя, Преблагий Боже и Прещедрый Господи, без славы, и без дыхания, и безобразна: и плачуся, держащи Тя, яко не надеяхся, увы Мне, видети Тя, Сыне Мой и Боже.

Слава: Не изглаголеши ли Рабе Твоей слова. Слове Божий? Не ущедриши ли, Владыко, Тебе Рождшую? Глаголаше Чистая, рыдающи и плачущи, облобызающи Тело Господа Своего.

И ныне: Помышляю, Владыко, яко ктому сладкаго Твоего не услышу гласа, ни доброты Лица Твоего узрю, якоже прежде Раба Твоя: ибо зашел еси, Сыне Мой, от очию Моею.

Кондак. Нас ради Распятаго, приидите, вси воспоим, Того бо виде Мариа на древе и глаголаше: аще и распятие терпиши, Ты еси Сын и Бог Мой.

Икос. Своего Агнца Агница зрящи к заколению влекома, последоваше Мариа простертыми власы со инеми женами, сия вопиющи: камо идеши, Чадо? Чесо ради скорое течение совершаеши? Еда другий брак паки есть в Кане, и тамо ныне тщишися, да от воды им вино сотвориши? Иду ли с Тобою, Чадо, или паче пожду Тебе? Даждь Ми слово, Слове, не молча мимо иди Мене, Чисту соблюдый Мя: Ты бо еси Сын и Бог Мой.

Песнь 7.

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Где, Сыне Мой и Боже, благовещение древнее, еже Ми Гавриил глаголаше? Царя Тя, Сына и Бога Вышняго нарицаше: ныне же вижу Тя, Свете Мой сладкий, нага и уязвлена мертвеца.

Избавляяй болезни, ныне приими Мя с Собою, Сыне Мой и Боже, да сниду, Владыко, во ад с Тобою и Аз: не остави Мене едину, уже бо жити не терплю, не видящи Тебе сладкаго Моего Света.

Слава: С другими женами мироносицами, рыдающи Непорочная горце, износима видящи Христа, глаголаше: увы Мне, что вижу! Камо идеши ныне, Сыне Мой, а Мене едину оставляеши?

И ныне: Изнемогающи и рыдающи Непорочная, мироносицам глаголаше: срыдайте Ми и сплачитеся горце: се бо Свет Мой сладкий и Учитель ваш гробу предается.

Песнь 8.

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Деву рыдающу Иосиф видев, растерзашеся весь и вопияше горько: како Тя, о Боже мой, ныне погребу раб Твой? Какими плащаницами обвию Тело Твое?

Паче ума превзыде странное Твое видение, носящаго тварь всю Господа: сего ради Иосиф яко мертва Тя на руку своею и с Никодимом носит и погребает.

Слава: Странную вижу и преславную тайну, Дева вопияше Сыну и Господу: како в худом гробе полагаешися, мертвыя повелением возставляяй во гробех?

И ныне: Ни от гроба Твоего востану, Чадо Мое, ни слезы точащи престану Раба Твоя, дондеже и Аз сниду во ад: не могу бо терпети разлучения Твоего, Сыне Мой.

Песнь 9.

Ирмос: Бога человеком не возможно видети, на Негоже не смеют чини Ангельстии взирати: Тобою бо, Всечистая, явися человеком Слово воплощенно: Егоже величающе, с небесными вои Тя ублажаем.

Радость Мне николиже отселе прикоснется, рыдающи, глаголаше Непорочная: Свет Мой и Радость Моя во гроб зайде: но не оставлю Его единаго, зде же умру и спогребуся Ему.

Душевную Мою язву ныне исцели. Чадо Мое, Пречистая вопияше слезящи: воскресни и утоли Мою болезнь и печаль, можеши бо, Владыко, елико хощеши и творищи, аще и погреблся еси волею.

Слава: О како утаилася Тебе есть бездна щедрот, Матери в тайне изрече Господь? Тварь бо Мою хотя спасти, изволих умрети, но и воскресну и Тебе возвеличу, яко Бог небесе и земли.

И ныне: Воспою милосердие Твое, Человеколюбче, и покланяюся богатству милости Твоея, Владыко: создание бо Твое хотя спасти, смерть подъял еси, рече Пречистая: но Воскресением Твоим, Спасе, помилуй всех нас.

Великая Суббота Канон «Волною морскою»

Песнь 1.

Ирмос: Волною морскою скрывшаго древле [Того, Кто в древности скрыл волною морскою] гонителя мучителя [фараона], под землею скрыша спасенных отроцы [под землею скрыли, т. е. убили дети спасенных]: но мы, яко отроковицы [как юные девы], Господеви поим: славно бо прославися.

Господи, Боже мой! Исходное [погребальное] пение и надгробную Тебе песнь воспою, погребением Твоим жизни моея входы отверзшему и смертию смерть и ад умертвившему.

Горе Тя на Престоле и доле во гробе, премирная [небесные] и подземная [создания, существа], помышляющая, Спасе мой, зыбляхуся [трепетали] умерщвлением Твоим: паче ума бо виден был еси мертв, Живоначальниче.

Да Твоея славы вся исполниши, сшел еси в нижняя земли: от Тебе бо не скрыся состав мой, иже во Адаме, и погребен, истлевша мя обновляеши, Человеколюбче.

Песнь 3.

Ирмос: Тебе, на водах повесившаго всю землю неодержимо, тварь, видевше на лобнем [месте] висима, ужасом многим содрогашеся: несть свят, разве Тебе, Господи, взывающи.

Образы погребения Твоего показал еси, видения умножив [ранее во множестве видений]. Ныне же сокровенная Твоя [тайны Твои] богомужно уяснил еси и сущим во аде [как Богочеловек, открыл и сущим во аде], Владыко: несть свят, разве Тебе, Господи, взывающим.

Простерл еси длани [руки] и соединил еси древле разстоящаяся [прежде разделенное]. Одеянием же, Спасе, еже в плащанице и во гробе, окованныя разрешил еси: несть свят, разве Тебе, Господи, взывающия.

Гробом и печатьми, Невместиме, содержимь был еси хотением [добровольно]: ибо силу Твою действы [делами, действими] показал еси, богодейственно [всемогущую, богодейственную] поющим: несть свят, разве Тебе, Господи Человеколюбче.

Седален. Гроб Твой, Спасе, воини стрегущии мертви от облистания явльшагося Ангела быша, проповедающа женам Воскресение. Тебе славим, тли потребителя! Тебе припадаем, Воскресшему из гроба и Единому Богу нашему!

Песнь 4.

Ирмос: На кресте Твое Божественное истощание провидя, Аввакум, ужасся, вопияше: Ты сильных пресекл еси державу, Блаже, приобщаяся сущим во аде, яко Всесилен.

Седмый день днесь освятил еси, егоже древле благословил еси упокоением дел: преводиши бо всяческая и обновляеши, субботствуя, Спасе мой, и назидая.

Силою лучшаго, победившаго Тебе, от плоти душа Твоя разделися, растерзающи бо обоя узы – смерти и ада, Слове, державою Твоею.

Ад, Слове, срет [встретил] Тя, огорчися, человека зря [видя] обожемна, уязвлена ранами и Всесильнодетеля [и при этом Всесильного], страшным же зраком погибе [погиб от страшного для него зрелища].

Песнь 5.

Ирмос: Богоявления Твоего, Христе, к нам милостивно бывшаго, Исаиа, Свет видев Невечерний, из нощи утреневав, взываше: воскреснут мертвии и востанут сущии во гробех, и вси земнороднии возрадуются.

Новотвориши земныя [обновляешь все земное], Создателю, перстен быв [Сам, по человечеству, будучи из праха земного], и плащаница и гроб являют еже в Тебе, Слове, таинство. Благообразный бо советник Тебе Рождшаго [Бога Отца] совет образует [намерение, замысел], в Тебе велелепно [величественно] новотворящаго мя.

Смертию – смертное, погребением – тленное прелагаеши [изменяешь]: нетленно твориши бо, боголепно безсмертно творя приятие [ибо Ты делаеши нетленным то, что Ты принял], [ведь] плоть бо Твоя истления не виде, Владыко, ниже [ни] душа Твоя во аде страннолепно [дивным образом] оставлена бысть [не была оставлена].

Из Небрачныя прошед и прободен в ребра, Содетелю мой, из Нея соделал еси обновление Евино, Адам быв, уснув паче естества сном естественным и жизнь воздвигнув от сна и тления, яко Всесилен.

Песнь 6.

Ирмос: Ят бысть, но не удержан в персех [в утробе] китовых Иона: Твой бо образ нося, Страдавшаго и погребению давшагося, яко от чертога, от зверя изыде: приглашаше же кустодии [и взывал к страже у Твого гроба]: хранящии суетная и ложная, милость сию оставили есте [вы, храняще суетные и ложные верования, утратили в них Самого Милоседного Бога].

Биен был еси, но не разделился еси, Слове, еяже причастился еси плоти: аще бо и разорися Твой храм во время страсти, но и тако един бе состав Божества и плоти Твоея. Во обоих бо Един еси Сын, Слове Божие, Бог и Человек.

Человекоубийственно, но не богоубийственно бысть прегрешение Адамово: аще бо и пострада Твоея плоти перстное существо, но Божество безстрастно пребысть, тленное же Твое на нетление преложил еси и нетленныя жизни показал еси источник Воскресением.

Царствует ад, но не вечнует [не вечно властвует] над родом человеческим: Ты бо, положся во гробе, Державне, живоначальною дланию, смерти ключи развергл еси и проповедал еси от века тамо спящим избавление неложное, быв, Спасе, мертвым первенец.

Кондак. Бездну заключивый мертв зрится, и смирною, и плащаницею обвився, во гробе полагается, яко смертный, Безсмертный: жены же приидоша помазати Его миром, плачущия горько и вопиющия: сия Суббота есть преблагословенная, в нейже Христос, уснув, воскреснет тридневен.

Икос: Содержай вся на Крест вознесеся, и рыдает вся тварь. Того видящи нага висяща на древе, солнце лучи сокры, и звезды отложиша свет: земля же со многим страхом поколебася, и море побеже, и камение распадеся, гроби же многи отверзошася, и телеса восташа святых мужей. Ад низу стенет, и иудее советуют оклеветати Христово Воскресение. Жены же взывают: сия Суббота есть преблагословенная, в нейже Христос, уснув, воскреснет тридневен.

Песнь 7.

Ирмос: Неизреченное чудо, в пещи избавивый преподобныя отроки из пламене, во гробе мертв, бездыханен полагается, во спасение нас, поющих: Избавителю Боже, благословен еси.

Уязвися ад в сердце, прием Уязвеннаго копием в ребра, и воздыхает, огнем Божественным иждиваемь [поглощаемый] во спасение нас, поющих: Избавителю Боже, благословен еси.

Богат гроб: в себе бо приим яко спяща Содетеля, жизни Божественное сокровище показася, во спасение нас, поющих: Избавителю Боже, благословен еси.

Законом умерших [по закону смерти] еже во гробе положение, всех приемлет Жизнь [сама Жизнь приемлет положение во гроб], и сего источника показует востания [воскресения], во спасение нас, поющих: Избавителю Боже, благословен еси.

Едино бяше неразлучное еже во аде, и во гробе, и во Едеме, Божество Христово со Отцем и Духом, во спасение нас, поющих: Избавителю Боже, благословен еси.

Песнь 8.

Ирмос: Ужаснися бояйся небо, и да подвижатся основания земли: се бо в мертвецех вменяется в вышних Живый и во гроб мал странноприемлется, Егоже, отроцы, благословите: священницы, воспойте: людие, превозносите во вся веки.

Разрушися Пречистый храм, падшую же совозставляет скинию: Адаму бо первому Вторый, Иже в вышних Живый, сниде даже до адовых сокровищ, Егоже, отроцы, благословите: священницы, воспойте: людие, превозносите во вся веки.

Преста дерзость учеников [исчезло дердновение учеников, но], Аримафей же изрядствует Иосиф: мертва бо и нага зря над всеми Бога, просит и погребает зовый: отроцы, благословите: священницы, воспойте: людие, превозносите во вся веки.

О чудес новых! О благости! О неизреченнаго терпения! Волею бо под землею печатлеется, Иже в вышних Живый, и, яко льстец, Бог оклеветается, Егоже, отроцы, благословите: священницы, воспойте: людие, превозносите во вся веки.

Песнь 9.

Ирмос: Не рыдай Мене, Мати, зрящи во гробе, Егоже во чреве без семене зачала еси Сына: востану бо и прославлюся, и вознесу со славою непрестанно, яко Бог, верою и любовию Тя величающия.

В страннем Твоем рождестве, болезней избежавше паче естества, ублажихся, Безначальне Сыне: ныне же Тя, Боже мой, бездыханна зрящи мертва, оружием печали растерзаюся люте: но воскресни, яко да возвеличуся.

Земля покрывает Мя хотяща, но устрашаются адовы вратницы, одеяна видяще одеждою окровавленою, Мати, отмщения: враги бо Крестом поразив, яко Бог, воскресну паки и возвеличу Тя.

Да радуется тварь, да веселятся вси земнороднии, враг бо пленися ад: с миры жены да сретают, Адама со Евою избавляю всеродна и в третий день воскресну.

Стихира на целование Плащаницы.

Приидите, ублажим Иосифа приснопамятнаго, в нощи к Пилату пришедшаго и Живота всех испросившаго. Даждь ми Сего страннаго, Иже не имеет где главы подклонити: даждь ми Сего страннаго, Егоже ученик лукавый на смерть предаде: даждь ми Сего страннаго, Егоже Мати, зрящи на Кресте висяща, рыдающи вопияше и матерски [матерински] восклицаше: увы Мне, Чадо Мое! Увы Мне, Свете Мой и утробе Моя возлюбленная! Симеоном бо предреченное в церкви днесь собысться: Мое сердце оружие пройде, но в радость Воскресения Твоего плач преложи. Покланяемся Страстем Твоим, Христе: покланяемся Страстем Твоим, Христе: покланяемся Страстем Твоим, Христе, и Святому Воскресению.

Стихиры на «Господи воззвах»[197]

Днесь ад, стеня, вопиет: уне мне бяше [было бы мне лучше], аще бых от Марии Рожденнаго не приял: нашед бо на мя, державу мою разруши, врата медная сокруши: души, яже содержах прежде, Бог сый воскреси. Слава, Господи, Кресту Твоему и Воскресению Твоему.

Днесь ад, стеня, вопиет: разрушися моя власть: приях Мертваго яко единаго от умерших, держати же Сего отнюдь не могу, но погубляю с Ним вся, над нимиже [над чем] царствовах: аз имех мертвецы от века, но се Сей всех воздвизает. Слава, Господи, Кресту Твоему и Воскресению Твоему.

Днесь ад, стеня, вопиет: поглощена бысть моя держава. Пастырь распятся и Адама воскреси: над нимиже царствовах, тех лишихся, и яже поглотих возмогий, всех извергох. Истощи гробы Распныйся, изнемогает смерти держава. Слава, Господи, Кресту Твоему и Воскресению Твоему.

Слава: Днешний день таинственно великий Моисей прообразоваше, глаголя: и благослови Бог день седмый. Сия бо есть благословенная Суббота, сей есть упокоения день, воньже почи от всех дел Своих Единородный Сын Божий, по смотрению на смерть, плотию субботствовав: и еже бе, в то паки возвращся, воскресением дарова нам жизнь вечную, яко Един Благ и Человеколюбец.

И ныне: Всемирную славу, от человек прозябшую и Владыку рождшую, небесную дверь, воспоим Марию Деву, безплотных песнь и верных удобрение: Сия бо явися небо и храм Божества: Сия, преграждение вражды разрушивши, мир введе и Царствие отверзе. Сию убо имуще веры утверждение, поборника имамы из Нея рождшагося Господа. Дерзайте убо, дерзайте, людие Божии: ибо Той победит враги, яко Всесилен.