Повесть и чюдеса Пречистые Богородицы, честнаго и славнаго Ея явления образа, иже в Казани

Повесть и чюдеса Пречистые Богородицы, честнаго и славнаго Ея явления образа, иже в Казани

Месяца Июля в 8 день.

Повесть и чюдеса Пречистые Богородицы, честнаго и славнаго Ея явления образа, иже в Казани.

Списано смиренным Ермогеном, митрополитом Казаньским.

Благослови, отче.

Аще убо и предивно чюдо содеяся в роде нашем милостивным посетом Творца благому всему, Господа нашего и Бога Исуса Христа, и рождьшей Его Пресвятыя и Преблагословеныя Владычицы нашея Богородицы и Приснодевыя Мария пречюдною и чюдотворною иконою в преславном граде Казани: но како возмогу, недостоин сый и недостойне устне имея, провещати таковая?

Но обаче, надеяся на неизреченныя щедроты Сына Божия и Того Рождьшия молитвы, вселенныя учителя глагол восприиму: благословен Бог и Отец Господа нашего Iсуса Христа, Отец щедротам и Бог всякия утехи, утешаяи нас о всякой скорби нашей и благословивый нас благословением духовным. Преже убо праведный гнев свой, безакония ради нашего, вмале испусти на нас, оцыщая многия грехи наша: и в мало дней оскорбихомся. Потом же, благодати ради Божия, скорбная забыхом неизреченнаго ради человеколюбия Божия на нас, и радости несказанней сподобихомся, явления ради иконы Божия Матери и Тоя Превечнаго Младенца Господа нашего Iсуса Христа. Повсюду убо протекоша, яко гром, во вся конца россиския земля Божие к нам милостивное посещение — Богородицины иконы явление и неизреченные чюдеса, ихъже подает неоскудне с верою приходящим. Мне же, недостойному, самовидцу бывшу, како или коими чюдесными благотворении яви Бог и Богородица от земных недр чюдотворный Свой образ (яко же преди простретися слово хощет), писанию ж предати замедлившу или от недостатка разума, или от нерадения и душегубителные лености, ово же и страха ради недостоинства: пленицами бо моих грехов стягнут есмь и таковым преславным вещем нелепо ми бе коснутися, но разве точию безаконня моя знати и просити отпущения безчисленым моим согрешением. Но понеже желание привлачит мя и страх глаголати нудит мя, греси же мои, яко бремя тяжко, отяготеша на мне: и что убо сотворю? дерзну ли к начинанию? что убо? реку ли или запрещу себе окаянства ради моего? или паки внимаю восходящая на сердце мое блаженьством о Всепетей, и Богоприятней Богородицы и Приснодевей Марии? Но Ты Сама содействуй ми, о Преблагословеная, Заступнице Усердная, Мати Бога Вышняго, яко да воля иже ис Тебе рождьшагося Христа Бога нашего будет: да ми, недостойному, помрачивыйся ум мой тобою, о Всенепорочная, просветится (ты бо за всех молиши сына своего, Христа Бога нашего) и пишущу ми содействуй: всем бо твориши спастися, в державный Ти покров прибегающим. Множицею бо воспомянух, некогда же и слезы испустих, ведый мое недостоинство. Но обаче и се ми во ум прииде, яко неправедно есть Божиих таин и неизреченных к нам и многомилостивных дорованиих в забвения глубине погружати, имже многим источником целебным и самовидец бых: и, елико видех и слышах о пречюдней Ти иконе, подай ми, о Всепетая, глаголати и писати, и всех нас заступи, Госпожа Царице. Аще по достоянию и несмь достоин похвалы Тебе принести, малы некия от великих; но обаче сподоби мя, о Владычице, о Твоих неизреченных на нас благодеяних хвалу Тебе принести; и яко же сподобила мя еси, о Всеблаженая, недостойнаго и грешнаго, скверными моими руками преже всех священных прикоснутися пречистому Твоему образу и чюдотворнай иконе и Сына Твоего Христа Бога нашего. Аще бо и вси достойни, но аз недостоин сый: но обаче влеком жадая, да поне прикоснуся пречистому Твоему и чудотворному образу, Владычице, и Превечнаго Ти младенца Спаса Христа.

Ныне же паки что реку или что возглаголю великоименитей Девей, паче же рещи многоименитей, пророки прореченней? Пять убо к десятим летом преидоша явлению чудотворныя Богородицыны иконы, чюдесная же исцеления безпрестани неоскудно бывают, и вся страсти душевныя и недуги телесныя немедленно от человек отгоними бывают. Сие паки призывает мя к торжеству и глаголати понуждает: и яко подобает ми и писанию сия предати, да не буду осужен, якоже и скрывый талант господина своего. Понеже убо человеческий род обыче и святых памяти духовные с похвалами празновати, а иже Пресвятей и Преславней Царице царски празники празновати, Пречистыя Богородицы и Приснодевы Мария, — сию попремногу паче онех любовию почитати должны есмы (Та бо есть божественый покров рабом своим), и притецати к тихому сему и доброму Пристанищу, скорой Помощнице, готовому и теплому Спасению, Покрову Девыя; и яко Вышшей и паче всех тварей вышшую похвалу принести, яко Царице и Владычице царя и Владыку всех рождьшую: Тоя бо ради праматерняя клятва потребися и Адам от вечных уз свободися, и Бог к нам примирися. Тогда бо Иаковля лествица утвердися. Богу хотящу по ней снити и человеком путь сотворити к небесным и человецы со ангелы во едино быша: не ктому, яко же тогда, со Ияковом древле борется, ибо Творец Иаковль на землю сниде, погибшую драхму взыскати хотя и Отцу принести. Темже пророцы тогда возрадовашася, своему пророчеству збытие зряще. Тогда убо Давыд, видев от семени его правнуку родившуся, бряцая в гусли, играя духом, глаголя: слыши, дщи, и виждь, и приклони ухо твое. Темже тогда не токмо пророцы, но и превышняя и земная тварь съпразноваше. Ныне же паки приспе новый празник честный Владычицы нашея Богородицы честнаго Ея образа иконы Одигитрия, крепкия помощница: да познают вси, яко не токмо, егда в мире бяше, ходатайственое к своему Творцу и Сыну показоваше, но и паче, и по преславном своем преставлении от земных в небесная, непрестанно милостивно нас присещая. Темже, оставльше начало словеси, на совершение ведемся шествующе. Да коснемся иже о сих беседе, елико подаст Святый Дух, преже похваливше ваше усердие теплое. Толико бо к церкви ваше тщание, паче-же к чюдотворней Богородицынай иконе вера и моление, елико чадом к матери, елико жаждущему ко источнику, елико кораблю к пристанищу. Толико и нас веселит преспеяние ваше, яко ныне явити нам о сем. Грех ради наших Бог наказуя нас и наводя на нас милостивне праведный гнев свой, овогда гладом, овогда нашествием иноплеменных, иногда мором и межусобными бранми, овогда пожаром и прочими напастьми жития, и беды и тесноты и недуги люты наводя на нас, — понужает же паче ленивыя и жестокия на благая и подобная и спасеныя пути. Се убо реченное пророком Давыдом к Господу: броздами и уздою челюсти их востягнеши, не приближающимся к Тебе многи раны. I во ином псалме глаголет: аще оставят закон Мой и в судбах Моих не пойдут, аще оправдания Моя осквернят и заповеди Моя не сохранят, посещу жезлом беззакония их и ранами неправды их, милость же Мою не разорю от них. Апостол: его-же любит Господь, того и наказует, бьет бо всякаго сына, его же приемлет; аще без наказания, преблудодейчища есте, а не сынове. Понеже зловодими есме человецы и неудобно шествие имамы к добродетели, и мало о спасении душь наших печемся, попущает Владыка наш Господь напастми и бедами, и скорбми и недуги лютыми. Даже к Нему обращаемся и о нашем спасении всеобразно печемся. Сия нам содеяшася праведным судом Божиим.

Бысть же сице. В лето 7087 [1579] при державе благочестиваго и христолюбиваго, благовернаго Государя Царя и великаго князя Ивана Васильевича всея Руси Самодержца, и при его благородных царевичех — князе Иване Ивановиче и князе Феодоре Ивановиче (ныне же Божиею благодатию Государь, Царь и Самодержец всея Руси), и при святейшем митрополите Антонии Московском и всея Руси, и при архиепископе Казанском Иеремее, месяца Июня 28 день, на память святыя мученицы Агрипены, бысть пожар в новопросвещенном граде Казани, по взятьи града в двадесят шестое лето, яко достовернейши сами видехом. Загореся в полуденное время близь церкви святаго Николы, иже зовется Тульский, во дворе некоего воина царева Данила Онучина. И мала некая часть посаду остася, и половина града к соборней церкви и двор архиепископль остася. Болшая же часть посада: и торги все, и во граде обитель боголепнаго Преображения Спасова, и двор великого князя — увы! вся огнь всеядец пояде и пожже и без вести сотвори. Людие же христолюбивии верою не отпадше, но познаша своя согрешения, на покаяние обратишася и начаша созидати церкви Божия и своя домы: и Божиею милостию место убо иноязычно и новопросвещено просвещашеся святыми церквами и Божественными учении. Языцы же невернии мнози бяху во граде и веры многи. И бысть им в притчю и в поругание истинная православная вера, источника же целебнаго не бе тогда во граде. Иноязычнии же, неверием одержими в сердцых своих, уничижаху нас, не ведяще Божия милости и силы: видеша бо окаяннии Божие милоседрие к нам, еже с милостию наказание; еже милуяй нас наказуя, яко отец чадолюбив, за наша согрешения, оцыщая грехи наша. Человеколюбец же Бог, видя терпение людей своих и веру их, и поругание, и поношение окрест живущих иноверных, и не терпя поношения и похуления на святыя иконы и да не рекут языцы: где есть Бог их, в него же веруют? Да заградятся уста, иже глаголют неправду и дабы убо исчезло и не помянулось жидовское и безсерменское суровство и тщегласное хуление их, и дабы искоренилось злоплевельное еретическое учение, и утвердилась бы и просветилась православная вера истинная християнская. греческаго закона, правым учением Господа нашего Iсуса Христа и святых его ученик и апостол и богоносных отец и всех святых, утвердивших православную веру Христову и научивших веровати «во Отца и Сына и Святаго Духа», неразделимую Троицу. Предстательством убо и молением Заступницы нашея Царицы Владычицы Богородицы и Приснодевы Мария, еже к Сыну Своему и Богу нашему присным предстоянием, ныне же ради благодати Божия в сие в последнее время показа нам праведное и всесветлое солнце, и отверзе породу Едема затвореннаго, и яви от земли пресветлую икону, источник неизчерпаемый, Своим человеколюбным смотрением в земли сокрыему чюдотворную икону Матери Своея, а нашея Царицы, Владычицы Богородици и Приснодевы Мария честнаго ея Одегитрия, и Свой человеколюбный образ. Отнюду же убо праведный гнев Свой за наше согрешение испусти, оттуду близ места того, яко камени вержением, и благодатию светящую лучю и исцеления источник показа. Яви убо себе Богородицына икона сицевым образом. Не яви убо образа своего Владычица ни святителю града, ни начальнику властелинску, ниже вельможи или богату, ниже мудру старцу: но яви свое честное сокровище, источник неизсчерпаемый приходящим с верою, чудный свой образ, некоего мужа от простых, имуща мудрость на войне стрелебную, сего дщи юнна, десяти лет суща, именем Матрона. Сей бо девицы явися чюдная она и пресветлая икона Богородицына. И после убо пожара в том же лете и месяце, сице нача являтися девицы оной, ей же имя преди рекохом, икона пресветлая Божия Матери. И веляше ей поити во град и поведати про икону Богородицыну, ея же виде, архиепископу и воеводам, дабы шед выняли образ Пречистые Богородицы от земленых недр: и место поведа ей, идеже последи обретоша драгаго бисера честное сокровище, чюдную икону Богородицыну. Девица же убо, юна и немыслена, боящеся поведати: и абие едва поведа матери своей, мати же глаголы ея ни во что же вменив. И последи же убо в видении не единою являшеся ей пресветлая и чюдная она икона и веляше ей без сумнения сие видение поведати. Девица же не единою, но и многажды, сказоваше матери своей явление чюдные тоя божественыя иконы: веляше ей без сумнения поведати сие видение. Во един же убо день случися девицы оной, ей же имя выше надписахом, спати в полудне: и внезапу девица обретеся посреди двора своего, в нем же живяше, и абие явися ей чюдная и пресветлая Богородицына икона страшным огненным образом, лучи испущая огнены, пресветлы и страшны зело, яко мнетися ей от пресветлых тех луч, сияющих от иконы, сожжене быти. И глас бысть от образа страшен, к девице глаголющ: «аще убо не повеси глагол Моих и не пойдеши от земленых недр выняти образа Моего, Аз же убо имам во иной улицы явитися и во ином граде, ты же имаши болезнена быти, дондеже и живота зле гонзнеши». Девица же, от страшнаго сего видения зело ужасшеся, паде на землю и бысть яко мертва, и лежаше на земли на мног час. И абие возопи велиим гласом к матери своей, дабы шед поведала архиепископу и правителем града того о чюдней и пресветлей иконе Преблагословеныя Владычицы нашея Богородицы и Приснодевей Марии; и поведа ей вся глаголы реченныя, яже слыша от пресветлыя иконы, и место указуя. Мати же ея скоро иде во град к воеводам, и девицу пред ними представи; повеле ей, да сама глаголет, яже о ней содеянная. Девица же поведа им вся глаголы реченныя, яже слыша от причюдныя и великолепныя Богородицины иконы, и место указуя. Они же убо, неверием одержими о пречестней Пречистыя иконе, о ней же девица поведа, и ни во что же вмениша. Мати же прослезився, вземь дщерь, иде к архиепископу, те же предиреченныя поведа глаголы и место указанное ей сказуя: дабы повелел выняти святую Богородицыну икону. Архиепископ же не внят речем ея и отосла ю безделну: бе же приход их в седмый час дне, обретоша же чюдный он пресветлый образ Богородицын в час вторый на десять, по пожаре на том же лете, месяца Июля в 8 день, на память святаго великомученика Прокопия. Бысть же сице. Пойде убо жена та к дому своему, поведая всем людям о чюдней иконе: како видение виде дщи ея. Людие же, дивящеся о глаголех ея и отхождаху не внимающе речем их. Она же, взем заступ и пришед к показанному месту, нача копати много время, и не обрете искомаго. Помале же убо начаша инии копати: и все уже место воскопаше, ничто же обретше. Предиреченная же она девица нача копати на месте, иде же пещь бе; таже и прочии с нею. И яко выкопаша мало боле двою лактей — оле чюдо! явися чюдотворная икона Владычицы нашия Богородицы и Приснодевы Мария, честнаго ея Одигитрия, купно с превечным младенцем, Господем и Богом нашим Исусом Христом. На чюднай же той иконе бе рукав однорядки сукна вишнева ветх; самый же чюдотворный образ светлостию чюдне сияя, якоже внове вапы начертан. Земному же праху никако же коснувшуся чюдному тому образу, яко-же сами видехом. Девица же, взем Пречистые образ со страхом и трепетом и радостию, и поставиша на том же месте. Людие же ту сущии возопиша, проповедающе немолчными гласы явление божественныя тоя иконы. И вскоре стекошася безчисленое множество благочестивых народа, вопиюще со слезами: «Владычице, спаси ны!» И послаша весть ко архиепископу и к первым града, яко обретоша Богородицын святый образ. Архиепископ же повеле скоро в колокол звонити. И пойде со кресты на место то со всем освященным собором, идеже обретоша чюдную Пречистые икону, с воеводы и со множеством народа. I виде Пречистые образ: яко-же нов дар пречюдне светяшеся, и дивися убо зело, яко такова переводом образа не видеша нигде же, и недоумевашеся. Страхом убо и радостию одержими, неверия ради своего, с плачем моляся и милости прося, и прощения о согрешении. Сице же и воеводы с плачем просяще милости, еже согрешиша к чюдотворному Пречистые образу, нерадением и неверием. И весь народ града стекашеся, на дивное то божественное чюдо веселящеся, со слезами и радостною душею хвалу Богу и Богородицы, о обретении многобогатаго и безценнаго сокровища возсылаху. Мне же тогда в чину поповсте святаго Николы, иже зовется Гостин, каменосердечен же сый: но обаче прослезихся и припадох к Богородицыну образу, и к чюдотворней иконе и к превечному младенцу Спасу Христу, и потом поклонихся архиепископу, и благословение испросих о еже бы повелел взяти ми пречюдную Богородицыну икону; архиепископ же благослови мя и повеле взяти ми. Аз же, аще и недостоин сый, но обаче со страхом и радостию прикоснухся чюдотворному тому образу: и взях з древца, иже бе поткнено на том месте, идеже в земли бе святая та и чюдная икона. И по повелению архиепископа, с прочими святыми иконами и честными кресты, идох со иконою в близ сущую ту церковь святаго Николы, иже зовется Тулский: и тамо, молебному пению совершившуся, и паки архиепископ со всем освященным собором, и первии града, и все множество православных народа, со женами вкупе и детми, вслед святых икон во град идущи. К новоявленней же чудотворней иконе безчисленое множество народа реяхуся, и друг друга попирающе, инии же по главам инех ходяще, к чюдотворному образу темены прикасахуся. Мне же, по повелению архиепископа, народа ради с чюдотворною иконою медленно идущю, но обаче толикое множество народа не соврати мя ни на десно, ни на шуе: несох бо носящаго всю тварь, и того рождешей пречюдную и чудотворную икону. И в той час Пречистые Богородицы образ показа чюдо.

Чюдо 1-е.

Человека просителя, именем Иосифа, не видевша очима ни мало, яко сам поведа, три лета, — прозрети того Владычица сподоби. Враг же, не навидяй спасения человеком, забыти тому сотвори вскоре богатаго Врача, подавшего исцеления, Пречистую Богородицу. Еже бы воздати молитву и благодарения, вместо того на прошение сребра паки устремися, ему же извыче: и верою отпаде и леностию отягчен, не получи до конца спасения. и неведения ради своего малу стезю зряше. Народи же, видевши чюдо, и болшую веру ко образу Пречистыя приложиша. И тако Пречистыя образ, чюдотворную икону, внесоша в соборную церковь Пресвятыя Богородицы честнаго и славнаго ея Благовещения. И ту в соборной церкви Владычица показа чюдо второе.

Чюдо 2-е.

Человека некоего, именем Никиту, не видевша очима ни мало света, прозрети того Богородица сподоби. Он же убо теплою верою припаде к чюдотворному Ея образу и получи здравие, хваля и славя Бога и Пречистую Богородицу. И тако, певше молебная пения, абие отидоша в домы своя со страхом и трепетом и радостию многою. На утрие же архиепископ служив божественную литоргию; народи же вси, приходяще в соборную церковь к чюдотворному образу и дароношение приносяще: инь злато, инь же сребро, и кто что можаше, кииждо по силе. Пречистая же Богородица нача являти чюдеса своя. Преже реченную же девицу Матрену с материею ея почтоша архиепископ же и воеводы и весь народ. Чюдную же икону списавше и преславное явление чюдотворныя тоя иконы, и чюдеса, бываемыя от нея, написаша и послаша в царствующий град на Москву к самодержавному царю Государю и великому Князю Ивану Васильевичю, всея Русии Самодержцу, и к сынома его — царевичю князю Ивану Ивановичю и царевичю князю Феодору Ивановичю, ныне же Божиею благодатию Государь Царь и Великий Князь, Самодержец всея Русии. И видеша убо христолюбивии царие чюдную икону Владычицы нашея Богородицы и Приснодевей Марии и честнаго ея Одегитрия и дивишася зело: яко такова образа переводом нигде же не видеша. Благоверный же Царь Государь и Великий Князь и сынове его повелеша на том месте церковь поставити, идеже обретеся чюдотворная икона, и монастырь дев повеле устроити, и келии поставити и ограду монастырю оградити, и милостыню доволну повеле дати из своей царские казны: священному собору и игуменье, и 40 сестрам урок летний, еже и быст. И церковь поставиша во имя святыя Богородицы честнаго ея Одегитрия деревяну, и ограду монастырю сотвориша. Честную же ону и чюдотворную икону Пресвятыя Богородицы отнесоша в монастырь с молебным пением со кресты: архиепискуп и боляре со всем народом проводиша честно. Предиреченную же девицу Матрену постригоша в том же монастыри: и наречено бысть имя ей Мавра во иноких, не по мнозе же времени пострижеся и мати тоя девицы. Поставиша же и другую церковь теплую с трапезою во имя Рождества Пречистыя Богородица. И абие нача являти Богородица чюдеса Своя.

Чюдо 3-е.

Человек некто из Вияжскаго града люте болезнию одержим бе и приведен бысть к пречистому и чюдотворному образу женою своею, и моляшеся с теплою верою Богородицы и не отпаде прошения своего: получи здравие и отыде в дом свой радуяся.

Чюдо 4-е.

Некогда убо отроча материею своею принесено в церковь, слепо очима; мати же его стояше пред образом Богородицы, с плачем моляшеся о прозрении отрачате. Отроча же внезапу нача руками осязати по лицу матерь свою. Народи же убо вси молишеся Пречистыя образу; архиепископ же стояше на месте своем, зряше на отроча и виде сие, яко отроча матерь свою рукама осязаше. И повеле принести яблоко красно и показати отрочати. Отроча же и яблоко нача хватати: и вси истину увидевше, яко прозре отроча; и славу воздаша Христу Богу и Пречистой Его Матери Владычицы нашея Богородицы, творяще дивная чюдеса.

Чюдо 5-е.

Некто сын боярской, именем Ивашка тако нарицаем, прослутием же Кузминской; у него же бе жена болна ногами: не можаше ими ни мало двигнути. Болезнь бо велми одержаше ю и ничим же себе не можаше помощи, но паче труднее бываше. И абие повеле себе принести к чюдотворному образу Пречистей Богородицы и, молебная отпев, со многою верою и со слезами моляшеся, милости прося: и абие получи здравие, и отойде в дом свой радуяся.

Чюдо 6-е.

Бысть же убо, в веси сына боярскаго Василия Рагозина, некоего поселянина жене явися святая Богородица и веляше ити ей пречистому образу, иже есть в Казани, и поведати мужу своему, дабы шед молился чюдотворному образу. Она же не внят речем Ея и мужу не сказа. Явижеся убо и второе сама Владычице: и абие некая божественная сила взят руку ея и удари ю по лицу ея и бысть рука ея суха. Жена же прииде во град и поведа все по ряду архиепископу случшаяся ей: и прииде к чудотворному образу, и получи здравие. И абие утвердися рука ея, якоже и другая. и отиде в дом свой радуяся.

Чюдо 7-е.

Человек некто в граде Казани, именем Исак, прореклом бык, некоторыя вдовы сын, именем Улиты, верны сущей, боящейся Бога, на посаде проскурни верховных апостом Петра и Павла. И бысть в раслаблении полтретия годы; болезнь же его бе всем знаема, живущим окрест: не можаше велми ногами и до полу. И посла матерь свою к чюдотворному образу Пречистыя Богородицы молебная пети. Сам же убо в дому своем на одре лежаще и начат со слезами предо образом плакати и молитися Пресвяте Богородицы, дабы ему самому видети чюдотворный Богородицын образ. И в том часе виде себе мало легчайши от болезни: и абие милостию Пречистые Богородицы востав о собе на ногах и начат по малу поступати и, взем два посоха и абие подпираяся ими, пойде в монастырь к чюдотворному всемилостивому Богородицы образу. О великих Ти чюдес, Богородице! матери со слезами о сыну молящися, сын же ненадежно и сам в монастырь прииде: мати же его виде и изумися, и едва во ум прииде, и нечаемое известно уведе. И приложиша к слезам слезы, молящеся Богородицы о исцелении: и тако до конца получи здравие. И воздаша хвалу и славу Господу Богу и Пречисте Богородицы, месяца Апреля в 30 день отойдоша во свой дом, хваляще и славяще Бога, творящего дивная и преславная чюдеса.

Чюдо 8-е.

Жена некоего пришелца, Полоцкаго попа Григория. живяше в селе в Тагашеве (тако бо звашеся место то), именем Елена. Бысть же болна очима три лета и абие убо от многия тоя болезни и зрак отъяся, якоже уже не видети ей ни мало. И услыша убо многая и преславная чюдеса от иконы Пречистые Богородицы во граде Казани, и пойде во град к чюдотворному образу милости просити. И еще убо ей недошедши града Казани яко седми поприщ, и абие внезапу узре свет очима и мнетися ей, яко николиже ими болна бе: и пришед в монастырь к чюдотворному образу, хвалу воздаде Господу Богу и Причистой Богородицы.

Чюдо 9-е.

Поведа нам инок Иосиф, иже ныне погребный ключник в дому Пречистыя (тогда же живя в Троецком монастыре, иже в Казани): бысть, рече, болети ему очима, яко ни мала света видети; и абие обещася молебная пети Пресвятей Богородицы. И егда приидоша священицы с чюдотворным Пречистыя образом, в день недельный, в соборную церковь Пресвятыя Богородица честнаго и славнаго Ея Благовещения, к молебну, Иосиф же у чюдотворнаго образа во время молебнаго пения моляся прилежно. И не получи исцеления, и отиде скорбен. И абие возлеже от болезни: и сведен бысть в сон тонок, и видит икону Святыя Богородицы. И бысть ему от иконы глас, глаголющь: «востани и пойди в дом Пречистыя, и отпой молебная, и утри лице свое пеленою и тако получиши исцеление». Он же, встав вскоре, и повеле себе вести в монастырь Пречистые Богородицы. И отпев молебная и повеле себе покропити святою водою, и пеленою Пречистыя утерся. И в той час от очию его отбеже болезнь: и узре свет, и воздаст славу Богу и Пречистей Богородицы.

Чюдо 10-е.

Некто человек, именем Козма Окулов, Лаишескаво града, бысть во иступлении ума. Свои же ему совещаша итти в Казань к Пречистой Богородице в монастырь. Он же в себе быв и нача Пречистой Богородице о исцелении молитися: и помощию Пресвятыя Богородицы бысть ему облегчение, и прииде в монастырь и образ Пречистые сподобися видети по своему обещанию, якоже обещася. И молебная пев и абие получив совершено исцеление, и бысть здрав и отиде в дом свой, радуяся и славя Бога и Пречистую Богородицу.

Чюдо 11-е.

Человек некто во граде Казани, именем Онтон, прореклом Кажевар; ему же жена, именем Пелагия, не виде очима яко дней 40. Слышев же многия и преславныя чюдеса от Пречистыя Богородицы чюдотворнаго Ея образа, и в день недельный иде в монастырь Пречистые Богородицы. И многою верою одержима бе, не погреши надежи, но получи изцеление. Егда убо приидоша с чюдотворною иконою Богородицыною с соборнаго пения молебнаго священицы, жене же той случися срести икону Пречистыя, сошед с паперти церковные: и абие в той час прозре, и отиде в дом свой, радующеся, хваля и славя Бога и Пречистую Богородицу.

Чюдо 12-е.

Человек некий, именем Трофим, Ларионов сын, Колмогорсково уезду, волости Листра острова, во граде Самаре впаде в болезнь и люте трясавицею одержим; ктому-же на очи ему прииде тяжка болезнь. Он же, слышав Пречистыя Богородицы неизреченное милосердие, еже подает от чудотворныя своея иконы неоскудное исцеление с верою молящимся ей, и нача молитися Пресвятей Богородицы о исцелении. И абие видит во сне икону Пречистыя Богородицы, стоящу в возглавии своем, и глас слышит от чюдотворныя тоя иконы, именем его зовущ: «иди, рече, во град Казань ко образу моему, и тамо изцеление получиши». Он же возбнув и почю в себе облегчение не мало от трясавицы; тако-же и очная болезнь не якоже исперва бе. И прииде во град Казань в монастырь Пречистые Богородицы во время святые литоргия, и нача пред образом Пречистые неутешно плакати и с верою молитися, глаголя: «даждь ми, о Владычице, еже ми еси обещала; не мал бо путь трудихся милосердия Твоего ради». И абие вскоре исцеление получи от обою болезней: и очима прозре, и телом здрав бысть. И славя Бога и Пречистую Богородицу, поведая всем людям дивная и преславная от Пречистые иконы милосердие ея и скорое свое исцсление.

Чюдо 13-е.

Во граде Свияжском поп бе, ему-же имя Иван, церкви святаго великого чюдотворца Николы, иже зовется Жилецкой; ему-же жена, имя ей Домна. И по действу дияволю, некая суседа ея, или любви ради, или хотя над нею беду сотворити, в запойство упои ея, до токова зла. Идущи ей в дом свой, толик срам нанесе мужу своему и себе, яко и главотязю не обрестися на ней; людем же многим позор деющим, инем же и скорбящим о таковей срамоте: понеже муж ея человек искусен бе и ненавидя пьянства, и злых ошаяся, яко же и всем нам знати его. Самого-же попа того не бе тогда во граде, но бе отлучился некоего ради орудия. Жене же его на утрия и от сродник своих домашних слышавше сотворившая ей напасть, впаде во отчадние и в болезнь тяжку зело, ово страха ради, ово срама ради: и нача злым бесом одержима быти. И бе болезнь ея люта зело: на кийждо день и нощь до десятижды и вящи случашеся ей лютая та нестерпимая беда, зубы скрегча и пены теща, и составы членовныя троскотаху зле, якоже сам поп Иван поведа нам. И бе тако бедне стража до тридесяти пяти недель. Поп же той Иван, безпрестани моля Бога и Пречистую Богородицу о исцелении жены своей и святых угодник Божиих призывая в помощь, не единощи же и в Казань к чюдотворному образу Пречистыя Богородице привозя жену свою. И не получи ни мало отрады. Во сто же первом году, Февраля в 7 день, паки привезе жену свою в монастырь к Пречистей Богородицы: и начаша со многими слезами молити Бога о исцелении ея. Февраля ж 11 день бысть глас во сне игуменье монастыря Марье, дабы повелела бесную к чюдотворному образу прикладывати в то время, егда учнет бес томити ея. Игуменья же Марья вскоре повеле тому быти. И егда нача бес томити ея, и вземше беснующуюся, приложиша к чюдотворному образу Пресвятыя Богородицы: и абие, в той час, бысть недвижима от лютаго беса, и обретеся здрава. И многу хвалу и благодарение воздаша Богу и Пречистой Богородице и идоша в дом свой, славяще Бога.

Чюдо 14-е.

Во граде ж Казани человек некто, именем Дмитрей, прореклом Тоскутей, ремеством скорняк; ему-же жена, имя ей Домна. Случися ей болезнь тяжка зело, рукама и ногама скорчившимся. И люте болезни той притужающи ей, яко зрящим на ню умилне плакати. Дщи же ея, именем Неонила, девица, тою же болезнию зле одержима: по всему убо яко и мати ея страдаше. И в болезни своей к Пречистой Богородицы умилныя глаголы со слезами вопияху, о исцелении молящеся, простягщи же ся им болезни той на месячное. Дмитрей же, взем жену свою, и отвезе ю в монастырь в церковь Пресвятыя Владычицы нашия Богородицы, честнаго и чюдотворнаго образа явления. Жена же его нача со слезами и с воплем многим молитися Пречистой Богородице о исцелении, яко и незнающим ея рыдати и плакати. Дмитрей же отходит в дом свой, хотя и дщерь пояти к Богородицыну чюдотворному образу. И абие ненадежно радость обрете: пришед в дом свой, и виде дщерь свою здраву и ничтоже от болезни страждущу. И благодаря Бога и Пречистую Богородицу, иде вскоре к жене — поведати ей изцеление дщери своея. Времяни же тогда бывшу чтому на литоргии святому евангелию, в самое же то святое благовестие, пременися от недуга и жена его: и бысть здрава, яко николиже болев. Оле чюдо! во един час, по действу дияволю, дщи и мати люту скорбь болезнену восприяша: во един же час от чюдотворныя Богородицыни пречюдныя иконы и исцеление восприяша. Дмитрей же и вси людие видеша предивное скорое, Пречистою Богородицею, жене своей и дщери от болезни пременение; сугубо воздаша Богу и Пречистой Богородицы благодарение. Вопрошаху же жены его: како им найде со дщерию равенство недуга и во едино время? она же исповеда подробну: «бывши ей, рече, у некоего соседа на обеде, и по времени иде в дом свой, и найде на пути плат мал завязан, и подъем его, и принесе в дом свой; и развеза плат той — обрете в нем едину сребреницу да два ореха; и един орех сама снесть, другой же дщери вда: от того и пострадаша».

Чюдо 15-е.

Человек некто, именем Офонасей, Ерофеев сын, Ярославец, в день недельный приведен бысть в соборную церковь Пречистыя Богородицы честнаго Ея Благовещения. И многими человецы едва одолен бысть внити в церковь: бе бо беснуяся и реяся зело, и никако же взирая, и не глаголя ничто же. Тогда же бе, яко же обычай, и чюдотворная Богородицына икона принесена в соборную церковь: и поставиша его пред местным образом Пречистые Богородицы честнаго и славнаго Ея Благовещения и пред чюдотворною Богородицыною иконою. Он же никако же смотря, ниже глаголя. По отпетии же молебнов, взем святыя воды и покропих его: он же воззрев и нача по малу во ум приходити. И видев образ Пресвятыя Богородицы и рече: «Пречистая» и ту приложиша его к Богородицину чюдотворному образу и к прочим святым иконам. И по мале нача глаголати. Молебному же пению совершившуся и чудотворней иконе в монастырь пошедше, нам же святую и чюдотворную Богородицыну икону, яко же обычей, проводихом. Тому же Офонасью в соборную церковь возвратитися повелехом, божественныя ради литоргия. И егда начаша чести святое евангелие, той же предиреченный Афонасие совершено исцеле молитвами Пресвятыя Владычицы нашея Богородицы, юже приносит о всех нас к Сыну Своему, Христу Богу нашему. Нам же, вопрошающим его о содеянных, яже о нем: что и како исперва прилучися болезнь ему? он же поведа: «видех, рече, в нощи, яко приидоша многи толпы бесов и претяху ему мукою, и показующе ему мечты своими, яко бы взношаху его на высоту и низпущаху доле, и ина злая деюще ему. Болезнь же его бе две седмицы. Милостию же Божиею и молением Пречистыя Богородица отиде в дом свой здрав, радуяся и хваля Бога и Пречистую Богородицу.

Чюдо 16-е.

Сожительствуя же ми в кельи моей инок Арсений, зовомый Высокий, иже последи бысть архимарит монастыря святаго Спасова Преображения. И прилучися ему болети ногою: болезнь же ту нарицаху камчюг, инии же инако зваху. Мы же тому неразсудни суще, не ведяху имени болезни той; но обаче болезнь крепка зело, яко едва мощи ему мало ступати нужи ради и здоровою ногою: ис келии же, кроме великия нужа, никако-же исходити ему, болезни тоя ради. В тоже время и повеление от Самодержавного Государя Царя и Великого Князя Феодора Ивановича всея Руси прииде к нам, по молению иноков монастыря боголепново Спасова Преображения, иже в Казани, благословити и поставити предипомянутого Арсенья архимаритом. Тогда же поставити его не бе мочно, зелныя ради его болезни. Приспевшу же празнику Преполовения (в онь же день святая и апостольская церкви празнество повсюду прия исходити с литиею и молебная пения совершати), мне же ис келия в церковь еще не изшедшу, с чюдотворнаю же Богородицынаю иконаю приидоша священицы, якоже обычей. Предипомянутый же Арсеней во оконце смотря и со слезами Богородице о исцелении моляся. И внезапу нача с великим рыданием плакати и благодарити Бога и Пречистую Богородицу, поведая своей болезни изцеление. Токмо, рече, глас испустих и прослезихся, Богородица же вскоре милосердие Свое показа на мне И той час иде ис келия в соборную церковь сам о себе. И пришед в церковь, пев молебен и благодарение воздая Богу и Пречистой Богородицы о исцелении своем.

От образа же Пречистые Богородицы неисчетно многа исцеления подаваются приходящим с верою. Но обаче доволно и по ряду хто возможет исписати Богородицыны чюдеса? дерзнух бо написати от великих малая, ина же многа преминух: земли убо широта, и морю глубина, и Богородицына чюдеса неизочтена. Сия же написах, яко да не забвению предана будут в последняя времена.

Благочестивому же и Самодержавному Государю Царю и Великому Князю Феодору Ивановичу всея Русии исперва, отнеле же явися целебный источник — икона чюдотворная Пресвятыя Владычицы нашея Богородицы, вся сия знаема суть. И верою теплою и духом горя, яко же слышах от его царских уст ко мне, рабу его и богомолцу, глаголемая в то время, егда повеле мя Божиим изволением устроити в чин митрополита. Слышахом, рече, о милостивнем неизреченнем человеколюбии Божии и Пречистыя Богородицы на нас: како яви Богородица чюдотворную и пречюдную свою икону в нашей отчине Казани, простирая к нам милость свою; и како подает неизреченныя целбы с верою приходящим. И хощу, рече, недостаточная исполнити, еже и бысть. Повелением его царским, в лета 7102 [1594] в неделю святых жен мироносиц, Апреля 14 день, на память иже во святых отца нашего Мартина папы Римскаго, заложен бысть храм предивен камен Пречистыя Владычицы нашея Богородицы и Приснодевы Мария честнаго и славнаго Ея Одигитрия чюдотворнаго образа явления, а в пределе храм честнаго и славнаго Ея Успения; другой предел святаго благовернаго великаго князя Александра Невскаго, во иноцех Алексия, новаго чюдотворца. Священа же бысть святая та церковь и с приделы 7103 [1594] г. Октебря 27 дня в неделю, на память святаго мученика Нестера, где Iсус болшой обложен сребром того же лета; и теми местными иконами и книгами, и ризами, и прочими церковными потребами повеле Государь Благочестивый Царь и Великий Князь Феодор Иванович, всея Русии Самодержец, удоволити, еже и бысть. Самую же ту пречюдную и чюдотворную Пречистыя Богородицы икону златом и камением драгим и жемчюгом великим предивне украси царских сокровищ хранитель Деменша Иванович Черемисинов. Инокинь же стариц в монастыре 64. Хлеб им и денги и прочая потребная из царские казны.

Мы же Божиею благодатию и Пречистые Богородицы чюдотворным Ея образом хвалимся и веселимся и воспеваем песнь победную Сотворшему дивная чюдеса, во Троицы славимому Богу, Отцу и Сыну и Святому Духу ныне и присно и во веки веком. Аминь.

Источник: Творенiя святейшаго Гермогена, Патрiарха Московскаго и всея Россiи. С приложенiем чина поставленiя в Патрiарха. — Изданiе Церковной Комиссiи по чествованiю юбилейных событiй 1612, 1613 и 1812 годов. — М.: Печатня А. И. Снегиревой, 1912. — с. 1–16.