Акафист преподобной Евфросинии, Великой княгине Московской

Акафист преподобной Евфросинии, Великой княгине Московской

Кондак 1

Избранной от рода державнаго, преславнаго града Москвы покровительнице и всея Российский страны молитвенице, похвальное пение приносим ти, угоднице Христова Евфросиние. Ты же, яко имущая дерзновение ко Господу, Того умоли избавитися нам бед и скорбей и в будущем веце Царствия Небеснаго наследники быти, да зовем ти: Радуйся, преподобная княгине Евфросиние, жен российских красото и радование.

Икос 1

Ангелов Творец и Господь, предуведевый благое произволение твое, избра тя, благоверная княгине Евфросиние, во образ милосердия и благочестия женам Российским, да вси они, зряще твое терпение, любовь и богоугодное житие, во умилении сердец взывают ти тако:

Радуйся, родителей благочестивых Дмитрия и Анны чадо благословенное; радуйся, цвете благоуханный, во граде Суздали возращенный.

Радуйся, именем Евдокии, сиречь благоволение, в крещении нареченная; радуйся, от юности твоея благодати преисполненная.

Радуйся, отроковице, в вере и благочестии воспитанная; радуйся, ангельски на земли пожившая.

Радуйся, яко злато в огне искушений и скорбей очищенное; радуйся, образ праведныя благоверныя княгини всем русским людеу показавшая.

Радуйся, града Москвы хранительнице и заступнице; радуйся, Церкве Российския преславное украшение.

Радуйся, радости Царства Небеснаго сподобившаяся; радуйся, дерзновенная о нас пред Богом молитвеннице.

Кондак 2 Видя святитель Московский Алексий непорочную душу твою, ум и красоту, богоизбранная отроковице, яко невесту добру вручи тя великому князю Дмитрию Ивановичу, да будеши материю народу державы его, научая всяк возраст верных славити и воспевати Богу: Аллилуиа.

Икос 2

Разум во благочестии утвержден имущи, блаженная мати, не земныя радости в супружестве взыскавше, но паче супругу в добродетелех подражаете и того к делом добрым подвизавше, милосердие и любовь к людем стольнаго града показала еси. И бысть радость велия в народе о браце сем, и вси прославляху Бога, и радовахуся о тебе, и вопияху та, глаголюще:

Радуйся, от юности Бога всем сердцем возлюбившая; радуйся, евангельских заповедей верная исполнительнице.

Радуйся, великих святых земли Русския духовная ученице; радуйся, преподобным Сергием в житии праведнем наставленная.

Радуйся, на брак первосвятителем Российским Алексием напутствованная; радуйся, послушание своему духовному наставнику явившая.

Радуйся, с супругом твоим в любви и благочестии пожившая; радуйся, в супружеском благочестием житии крепкая помощнице.

Радуйся, чада твоя в вере и страсе Божием воспитавшая; радуйся, богобоязненному воспитанию и нас научающая.

Радуйся, жен благочестивых украшение; радуйся, любве и кротости Христовы вместилище.

Кондак 3 Сила Божия укрепляше тя в служении народу твоему и невредиму сохрани, егда смертоносная язва многих людей окрест тебе погубляше, и многажды в нападениих врагов соблюдаше тя от меча их и пленения. Ты же вся сия претерпела еси, благодарственно воспевая Богу: Аллилуиа.

Икос З

Имуще сердце милостивое и к людей страждущим любовию преисполненное, многи слёзы проливала еси, блаженная мати, в молитве пред Господом, да сохранит землю Русскую во дни бед и напастей, находящих от нашествия агарян и междоусобных браней князей русских, от смертоносныя язвы и града царствующаго разорения и запаления. Темже поминающе твое теплое к Богу о людех ходатайство и скорую бедствующим помощь, вопием ти из глубины сердечныя:

Радуйся, многи скорби претерпевшая; радуйся, в напастех на единаго Господа упование возлагавшая.

Радуйся, гнев Божий молитвами твоими утолявшая; радуйся, в бедах помощь Божию обретавшая.

Радуйся, материнскую любовь к людем страждущим явившая; радуйся, обидимых и гонимых заступнице. Радуйся, княгине благосердая, любовию своею всех покрывающая; радуйся, людем московским помощнице богодарованная.

Радуйся, к нищим и убогим милосердие неоскудное показавшая; радуйся, бедствующих благонадежное избавление.

Радуйся, людей российских надежде и упование; радуйся, милосердия сокровище неисчерпаемое.

Кондак 4 Егда буря великаго нашествия агарянскаго потрясе землю Русскую, супруг твой Дмитрий советом преподобнаго Сергия утверждаем, не убоялся еси силы вражия и на подвиг ратный с полками своими устремился еси. Тогда вси людие русския вкупе с тобою усердную молитву о избавлении страны своея вознесоша, воспевающее Богу песнь: Аллилуиа.

Икос 4

Слышавше ближний и дальний людие, яко дарова Господь победу православному воинству в брани лютей на поли Куликове, плач свой на радость преложиша. Ты же, угоднице Божия, во вся дни похода полков русских неотступно предстояла еси в молитве и возликовала еси о спасении отчизны твоея от нашествия иноплеменных. Темже и мы, радость победы сия приемше, о Господе радуемся, тебе же гласом хваления приносим таковая.

Радуйся, супруга твоего небоязненно тещи на битву с врагами благословившая; радуйся, о спасении земли Русския Господа умолявшая.

Радуйся, града Москвы твердое ограждение; радуйся, страны Российский верная защитнице.

Радуйся, о победе воинства русскаго со слезами молившаяся; радуйся, милостивая наша предстательнице.

Радуйся, великою победою на поли Куликове обрадованная; радуйся, в честь победы храм во имя Рождества Пресвятыя Богородицы создавшая.

Радуйся, христолюбивому воинству необоримая помощнице; радуйся, отечества твоего светильниче пресветлый.

Радуйся, любовь велию ко отечеству твоему земному явившая; радуйся, любовь сию и по смерти сохранившая.

Кондак 5 Боготечней звезде явилася еси подобна, святая мати, в житии твоем, егда супружеских уз свободившеся, всецело Господу себе предала еси, постом, бдением и молитвами работающи Ему дни и нощи и непрестанно вопиющи Создателю нашему: Аллилуиа.

Икос 5

Видя себе по смерти супруга сиротствующу, преподобная мати, возжелела еси единому Богу себе предати, обаче, воспитания ради чад, до времени в княжеских чертозех пре-бывающи и о делех земных попечение имети понуждаема, умысли в тайне Богу послужити, постом и бдением тело свое изнуряющи, людем же в светлых ризах себе являющи. Сего ради, воспоминающее твое благое изволение, с любовию величаем тя сице:

Радуйся, путь супружескаго богоугоднаго жития показавшая; радуйся, с верою и терпением крест вдовства твоего понесшая.

Радуйся, сыну твоему, в агарянском плену бывшему, спострадавшая; радуйся, молитвою и благодатию Божиею в скорби сей утешенная.

Радуйся, сыну твоему в управлении державы Российская помощнице мудрая; радуйся, во власти княжестей суету мирскаго жития уразумевшая.

Радуйся, во славе живущим Христианскаго жития правило бывшая; радуйся, славы токмо на Небесех искавшая.

Радуйся, непрестанными молитвами Бога прославлявшая; радуйся, яко постом и молитвою плоть твою духови покорила еси.

Радуйся, в тайне Богу послужившая; радуйся, сокровенно от людей Тому угодившая.

Кондак 6 Проповедница святаго жития, в тайне совершаемаго, явилася еси, блаженная мати. Обаче дух лукавый, не терпя подвигов твоих, клеветами и злоречиями возмути души чад твоих. Ты же, преподобная, клеветы и поношения с терпением великим понесла еси, благодарно воспевающи укрепившему тя Христу Богу: Аллилуиа.

Икос 6

Возсия миру свет добродетелей твоих, преподобная мати, егда, видящи чад твоих злыми о тебе клеветами смущаемых, призва их тайно и часть одежд пред ними открыты, да увидят тело твое от поста изсохшее и очернелое и плоть костем прильпнувшу; и тако смущение от сердец их отгнавши, никомуже поведати виденное повелела еси. Сего ради, почитающе подвиги и труды твоя, поем тебе сице:

Радуйся, во вдовстве своем чистоту непорочно сохранившая; радуйся, за ревность твою по Бозе в нечистоте жития оклеветанная.

Радуйся, яко в полунощи на молитву вставала еси; радуйся, во глубине смирения подвиги твоя от всех скрывавшая.

Радуйся, клеветы и хулы с благодарением потерпевшая; радуйся, к обидящим тя любовь сохранившая.

Радуйся, поношение безчестия терпением победившая; радуйся, обиды на людей суду Божию предавшая.

Радуйся, худыя помыслы чад твоих во благо исправившая; радуйся, во избежание славы, уста их молчанием заградившая.

Радуйся, смирением козни вражия разорившая; радуйся, блаженство гонимых за правду унаследившая.

Кондак 7 Хотя сын твой, великий князь Василий во дни лютаго нашествия Тамерлана защитити державу Русскую, по совету твоему, княгине милостивая и богомудрая, повеле Владимирскую икону Богоматере в Москву пренести. Тогда Пречистая Матерь Господа, яко всемогущая Царица со множеством воинов явися агарянскому хану и от предел земли Русския отьити повелела еси. Темже вси верни, от погибели заступлением Божией Матери спасеннии, в веселии пояху благих Подателю Богу: Аллилуиа.

Икос 7

Новое знамение милосердия Своего сотвори Пресвятая Владычица, егда странную победу над воинством Тамерлана без брани совершившуюся в день Сретения в Москве Владимирския иконы Ея даровала еси державе нашей. Сего ради и до ныне Церковь Божия прославляет тя, преподобная мати Евфросиние, яко мудрую советницу и молитвенницу ко Господу и величает тя тако:

Радуйся, Пресвятая Богородицы усердная почитательнице; радуйся, ревностная печальнице пред Нею за вся страждущия русския люди.

Радуйся, со слезами Пречистую о заступлении умолявшая; радуйся, икону Владимирския Богоматере во град Москву пренести благословившая.

Радуйся, пришествием иконы сея возвеселившаяся; радуйся, до земли пред нею поклонившаяся.

Радуйся, яко молитву твою о спасении Руси Пресвятая Богородица не отринула еси; радуйся, заступлением Пречистая за землю Русскую обрадованная.

Радуйся, град Москву от бед и губительств сохраняющая; радуйся, к Богородице молитвеннице наша неусыпная.

Радуйся, о спасении державы Российския богоугодная предстательнице; радуйся, хранительнице земли нашея.

Кондак 8 Странное чудо сотвори Господь в явлении тебе Архистратига Божия Михаила, иже осия тя лучами света Небеснаго, душу твою ко исходу уготовляя, и удержа язык твой. Егда же узрела еси, преподобная, третицею написанный образ явльшагося тебе Архистратига, разрешишася узы языка твоего и прославила еси Господа, творящаго дивная чудеса, поя Ему песнь: Аллилуиа.

Икос 8

Вся исполнена бе ревности к Церкви Божией, преподобная маги Евфросиние, обители иноческия и храмы во славу Божию воздаигла еси, к нищим и убогим любовь стяжала еси и многими добродетельми душу твою обогатила еси, имиже житие твое яко цветами благоукра-шается и духовно благоухает. Сего ради мы, тобою на путь веры и добродетели наставля-емии, восхваляем тя сице:

Радуйся, Архангельскаго посещения сподобившаяся; радуйся, явлением ангельским о отшествии твоем из жизни временныя извещенная.

Радуйся, сиянием Архангельскаго света озаренная; радуйся, светило милосердия, над градом Москвою возшедшее.

Радуйся, благолепие храмов Божиих возлюбившая; радуйся, многих обителей и храмов в земли нашей устроительнице.

Радуйся, обитель во имя Вознесения Господня в Кремле создавшая; радуйся, тамо покой души твоея обретшая.

Радуйся, вдовицам и сиротам защитнице и мати благосердая; радуйся, милости и сострадания к людем исполненная.

Радуйся, за любовь твою к людем велие дерзновение к Богу стяжавшая; радуйся, Царства Небеснаго и земнаго украшение.

Кондак 9 Всякое естество ангельское и человеческое возрадовашеся, зряще, како ты, преподобная мати, земную славу оставивши, в пристанище тихое – созданную тобою обитель Вознесения Господня потекла еси, яко жертву совершенную себе Богу приносящи. Темже в пострижении иночестем ангельский образ восприяла еси с именем Евфросинии, тезоименитой радости, да будеши радостию страждущей стране Российстей и верным ея чадом, поющим Богу ангельскую песнь: Аллилуиа.

Икос 9

Ветий многовещанных паче, глас народный немолчно славит тя, преподобная мати Евфросиние, ибо Сам Господь яви в тебе образ назидания не токмо в миру живущим, но и ликом иноческим. Ты же благодать Божию в иночестве восприяла еси, и новыми подвигами украсила еси житие твое. Темже дара исцелений от Бога сподобльшися, слепому подала еси прозрение и многих болящих исцелила еси. Мы же любовию и молитвою твоею ограждаеми и наставляеми, воспеваем тебе сице:

Радуйся, иноческое равноангельное житие возлюбившая; радуйся, ризы княжеския на власяницу иноческую пременившая.

Радуйся, ради Господа земнаго царства славу оставившая; радуйся, яко имя Евфросинии, сиречь радости, во иночестве получила еси.

Радуйся, во обитель, тобою созданную, вселившаяся; радуйся, богоугодно и праведно в ней пожившая.

Радуйся, прикосновением ризы твоея прозрение слепцу подавшая; радуйся, яко тридесяти недужным исцеление даровала еси.

Радуйся, в радость Господа твоего вшедшая; радуйся, вечную радость на Небеси обретшая.

Радуйся, радость истинную о Христе нам показавшая; радуйся, светом радости души наша озаряющая.

Кондак 10 Спасти хотя душу твою, житие земное равноангельно совершала еси, преподобная мати Евфросиние, в заповедех Божиих безпорочно ходящи, и дом Святаго Духа была еси. Темже по смерти твоей прослави та Господь в лице святых благоверных княгинь и преподобных жен, с ними же ныне Богу предстоящи, поеши хвалебную песнь: Аллилуиа.

Икос 10

Стену необориму и заступление царствующему граду Москве и всей стране Российстей яви Господь тобою, преподобная Евфросиние, ибо по отшествии твоем от земнаго бытия Сам Господь увенча тя и дарова благодать молитися с дерзновением о всех людех российских, ищущих твоея помощи и заступления. Темже и нам, с любовию чтущим та, буди ограждение крепкое, да тобою от всех нападений вражиих избавльшеся, со умилением зовем ти:

Радуйся, славу мира иноческим смирением поправшая; радуйся, о едином на потребу точию помышлявшая.

Радуйся, подвигом добрым подвизавшаяся; радуйся, крест богоугождения до конца понесшая.

Радуйся, в храме, тобою созданном, погребенная; радуйся, православными людьми града Москвы ублажаемая.

Радуйся, яко и по успении твоем нас не оставляеши; радуйся, яко свеща у гробницы твоея чудесно воспламенися.

Радуйся, непорочная голубице, от обители земныя в Небесныя обители возлетевшая; радуйся, венцем неувядаемым украшенная на Небеси.

Радуйся, от святых угодников радостно сретенная; радуйся, с Царицею Небесною у престола Господа предстоящая.

Кондак 11 Пение молебное во умилении сердец возносиша вернии в соборе Архистратига Михаила града Москвы, егда Божиим промышлением мощи твоя святыя, преподобная мати Евфросиние, обретошася в нем, яко сокровище велие Церкве Русския, от нихже приемлем в недузех исцеление, в скорбех утешение, в бедах благодатную помощь. Темже тя, яко заступницу и предстательницу нашу величаем и благодарно Богу и Владыце нашему воспеваем: Аллилуиа.