За усопших

Тропар

Глубиною мудрості человіколюбно вся строяй і полезная всім подаваяй, Єдине Содітелю, упокой, Господи, душу раба Твоєго, на Тя бо упованіє возложи, Творца і Зиждителя, і Бога нашего.

Слава: і нині:

Богородичен: Тебе і Стіну, і Пристанище імами, і Молитвенницу, благоприятну к Богу, Єгоже родила еси, Богородице безневістная, вірних спасеніе.

Приспів: Благословен єси, Господи, научи мя оправданіем Твоїм.

Святих лик обріте істочник жизні і двер райскую, да обрящу і аз путь покаянієм, погибшеє овча аз єсм, воззови мя, Спасе, і спаси мя.

Приспів: Благословен єси, Господи…

Агнца Божія проповідавше, і заклані бивше якоже агнци, і к жизні нестаріємій святії, і присносущиій преставльшеся, Того приліжно, мученици, моліте, долгов разрішеніє нам даровати.

Приспів: Благословен єси, Господи…

В путь узкий хождшиї прискорбний, всі в житії крест, яко ярем, вземшії і Мні послідовавшії вірою, приідіте, насладітеся, їхже уготовах вам почестей і вінцов небесних.

Приспів: Благословен єси, Господи…

Образ єсм неізреченния Твоєя слави, а ще язви ношу прегрішеній: ущедри Твоє созданіє, Владико, і очисти Твоїм благоутробієм, і вожделінное отечество подаждь ми, рая паки жителя мя сотворяя.

Приспів: Благословен єси, Господи…

Древле убо от несущих создавий мя і образом Твоїм Божественним почтий, преступленієм же заповіді паки мя возвративий в землю, от неяже взят бих, но єже по подобію возведи, древнею добротою возобразитися.

Приспів: Благословен еси, Господи… Упокой, Боже, раба Твоєго, і учини єго в раї, ідіже лици святих, Господи, і праведници сіяют, яко світила; усопшаго раба Твоєго упокой, презирая єго вся согрішенія.

Слава: Трисіятельноє Єдинаго Божества, благочестно поем, вопіюще: Свят єси Отче Безначальний, Собезначальний Сине і Божественний Душе, просвіти нас, вірою Тебі служащих, і вічнаго огня ісхити.

І нині: Радуйся, Чистая, Бога плотію рождшая во спасеніє всіх. Ею же род человіческий обріте спасеніє, Тобою да обрящем рай, Богородице Чистая, Благословенная.

Аллилуя, аллилуя, аллилуя, слава Тебі, Боже (тричі).

Упокой, Спасе наш, с праведними раба Твоєго, і сего всели во двори Твоя, якоже єсть писано, презирая, яко благ, прегрішенія єго, вольная і невольная, і вся яже в відінії і невідінії, Человіколюбче.

Кондак

Со святими упокой, Христе, душу раба Твоєго, ідіже ність болізнь, ні печаль, ні воздиханіє, но жизнь безконечная.