Подяка за всяке благодіяння Боже

Тропар

Благодарні суще недостойнії раби Твої, Господи, о Твоїх великих благодіяніїх, на нас бивших, сЛавяще Тя хвалим, благословим, благодарим, поєм і величаем Твоє благоутробіє і рабски любовію вопієм Ти: Благодітелю, Спасе наш, слава Тебі.

Кондак

Твоїх благодійній і даров туне, яко раби непотребнії, сподобльшеся, Владико, к Тебі усердно притекающе, благодареніе по силі приносим і Тебе, яко благодітеля і Творца славяще, вопієм: слава Тебі, Боже всещедрий.

Богородичен

Богородице, христіаном Помощнице, Твоє предстательство стяжавше, раби Твої благодарно Тебі вопієм: радуйся, Пречистая Богородице Діво, і от всіх нас бід Твоїми молитвами всегда ізбави, єдина вскорі предстательствующая.

Пісня хвалебна св. Амвросія, епіскопа Міланського

Тебе Бога хвалим, Тебе Господа ісповідуєм, Тебе предвічнаго Отца вся земля величаєт: Тебі всі Ангели, Тебі небеса і вся Сили, Тебі Херувими і Серафими непрестанними гласи взивают: Свят, Свят, Свят, Господь Бог Саваоф, полни суть небеса і земля величества слави Твося. Тебе преславний Апостольский лик. Тебе пророческоє хвалебноє число. Тебе хвалит пресвітлоє мученическоє воїнство. Тебе по всей вселенній ісповідуєт Святая Церков Отца непостижимаго величества покланяємого Твоєго істиннаго і Єдинороднаго Сина і Святаго Утішителя Духа.

Ти, Царю слави, Христе, Ти Отца присносущний Син єси. Ти, ко ізбавленію приємля человіка, не возгнушался єси Дівическаго чрева. Ти, одолів смерті жало, отверзл єси вірующим Царство Небесноє. Ти одесную Бога сідиши во славі Отчей, Судія віришися приіти.

Тебе убо просим: помози рабом Твоїм, їхже честною Кровію іскупил єси. Сподоби со святими Твоїми в вічній славі Твоєй царствовати.

Спаси люди Твоя, Господи, і благослови достояніє Твоє, ісправи я і вознеси їх во віки: во вся дні благословим Тебе і восхвалим імя Твоє во вік і в вік віка. Сподоби, Господи, в день сей без гріха сохранитися нам. Помилуй нас, Господи, помилуй нас; буди милость Твоя, Господи, на нас, якоже уповахом на Тя. На Тя, Господи, уповахом, да не постидимся во віки. Амінь.