Псалом 123

Аще не Госпожа наша Приснодева Мария заступит о нас у Бога, постигнут нас грех ради наших многия беды; внегда востати адским врагам на ны, живых убо пожерли быша нас, но Ты, премилостивая Заступнице, с нами и мы избавлени от них быхом; помощь наша во имя Господа и милостивое имя Твое, Владычице.

Песнь вместо славы

Радуйся, обрадованная от Бога Приснодево Марие! от призывания святейшаго имени Твоего бесы трепещут, от облистания славы Твоея власти темныя исчезают, Твоим рождеством врата райския отверзаются и избраннии Божии, с нимиже и вси грешницы, мытари и блудницы, покаявшиися Богу, входят в них невозбранно; молюся же Ти всеприлежно: посети и мою убогую душу, да во вся дни жизни моея верно послужу Тебе и избавиши мя от власти темныя.