Текст. СЛОВО О ЛЖИВЫХ УЧИТЕЛЯХ

Текст. СЛОВО О ЛЖИВЫХ УЧИТЕЛЯХ

л. 106 Слово святого отца нашего Иоана Златоустого архиепископа Костянтина града о лживых учителех. Господи.

Их же деля апостол глаголаше: пронырливии человечи волъсви прити имут на горшае пролщающе и пролщаеми ими. Вы же, христо- любци и книголюбци, в правду, убо христолюбци призывается по глаголанию Господню. Рече Бог: любяй мя в законе моемь поучиться день и нощь, рекше в книгах, книгы бо незабытную память имут, от Святого духа устроены.

Сия бо книгы дьржа в руку своею, не имаете забыти онех страшных книг будущего века, о них же пишется, яко судии седе и книгы разгнушася. Вижь, колико ти приобретение есть от почитания книжного. Горе же тому, иже не почитает Святых книг писания пред всеми, но яко Июда скрывый талант, рекше учение Господне, сведению толкования не пытающа, но яко Арий безумный храняще книгы и гнетуще в собе завистию сведение, моряще себе и онех гладом душевным. О семь гладе пророк рече:

Тако глаголеть Господь: будет в последняя дни, пущю глад на землю, не глад хлеба, ни глад воды, но глад еже слышати божественых святых книжных словес. Мнози бо ркуть дияволомь научени: и того де есть, еже в церкви слышати. Ене и в церкви добро и везде добро, писано бо есть: на всяком месте владыка Христос. И пакы глаголеть: ни в кровех, ни малым гласомь, но всьде великою силою глаголюще. Яко же пророк рече: хвалите его в гласе трубнемь, рекше высоко проповедайте и инде с высоким проповеданием учите. И пакы: възвышите глас свой и не убойтесь, утрудихся зовя и уча, низмолче ми горло. Исаяй рече: възпии силаю и не пощади гласа, проповедаяй и учай, яко трубу възвыши глас свой, проповедай Ерусалиму. И Господь рече: аще вы умолчите, то камение ли взопиеть?

Лепо же есть всем славити Бога и проповедати учение Его. Не рече Господь: увежь мя ты, пророче един, но да уведять мя вси от мала и до велика и научени будуть Богомь. Моисей не святитель бяше, но святители ставляше и учаше. Елдад и Молдад в зборе участа люди и взавидев им Исус Навгин, поведа Моисею. Моисей рече: еща ты им и завидиши,

л. 106 об. не дух ли научи вся прорицати, еща будеть има дал двух святый.

Много же наказа Святым духомь и зверем благовестовати на ползу человеком. Разумети же есть в притци, яко мнози пастуши наймиты наимують паствитию скота, а сами пиють или да спять. Тако же и словесных овець пастуши спять неведением или грубостью и упиваються неправедным събраным, лотакви деюще властелем и не хотять учити право, ловяще у них чаши или некоего взятия. Того ради простейшим учением учать и разумное, правое и дивное таять, им же быся спастись и в разум истиньный прити и обрести, и якоже и пророк рече: и вразуми мя и жив буду. О горе бо, рече, уже и пастуши волци быша и овець истьргаша, рекше, изъучиша попове люди и не на добро, но на зло. И Господь рече: о горе вам, вожеве слепии, яко затворяете царство Божие от человек, ни сами входите, но и хотящим внити не дадите, рекше, ни сами учите, но и учащих ненавидите. А ркуще: не мнози будете учители. Ведомо же буди, то есть слово речено еретик ради, занеже лихим учением на ересь люди учаху. Се есть истина, еже рече господь: жатва приспе многа, а делатель мало. Господь бы тому рад, аще бы делатель много было. Мнози бо идяхуть в веру и в крещение, а учителев мало. Того ради Господь учители многы постави. Пророк рече: тако глаголеть Господь: в оны дни излию от Духа моего на всяку плоть, и проркуть сынове ваши и дщери ваша, на рабы моя и на рабыня моя, и вси разумеють спасения Божия. Разумна же учения не изъяснився, и человеком откуду прияти разум спасения? Жидове же простое учение имели, а не разумеша Господа. Тако же и еретици не разумеющей писаний хулу принесоша на Господа. Того ради простейшим учением учать.

Того ради Павел апостол рече: подобаеть убо святителем послушь- ство имети от внешних. Ведомо же буди: послушание есть учение, а внешнии же суть иже не имуть ни ерейства ни дияконьства, но певци или четци суть. Се же прежереченое слово, еже Господь глагола не о хлебнемь гладе, но о душевнемь, рекше о учении книжнемь, рекше о гладе вечныя мукы ходотаи — сий глад есть ходотай паче всякого зла. Сего глада предъзря, пророк глаголаше: Боже мой, не промолци от мене и слушающих, рече, избави от смерти душа их и прекорми я в глад.

Рекше, егда пастуши възволчатся, тоща подобаеть овци овце паст- вити — в день глада насытятьср. Рекше: близ смьрть на години, не сущю епископу, ни учителю, да аще добре научить и простый — и то добро. В притци лепо есть разумети: егда бы посла рать к некоему граду, ти

л. 107 некто бы простьлюдин // въскликал: «люди, побегаете в град, рать идеть на вы!» То быша слышавъше, людие смышлении бежали быша в град и избыли бы зла, а несмышлении ръкли быша: «не князь мужь поведаеть, не бежим в град». Пришьдши бы рать избила, а другых повоевала. Была бы последняя льсть горши первых.

Разумейте же, братие како ти есть ныне:

Ратници суть беси, а учащего святителя несть, како бы убежати зла. Век бо сий короток, а мука долга, а концина близ, а вожа нетуть, рекше учителя. Учители бо наши наполнишася богатьством имения и ослепо- ша, да уже ни сами учать, ни им велять. О них же пророк рече: удебеле бо сердце людий сих, ушима своима тяжко слышать, очи свои съмжиша, и не хотять прияти разума спасеного, но и приимающих ненавидять. И сами быша врази своему спасению. О колицех и кацех вещиих послу- шающе и не хощем разумети! Тем же и не без ответа имим быти в день судный, егда бо явяться дела наша тайная и мышли злыя, егда судии сядеть книгы разгнушась, их же ныне слушающе не послушаем их. Откуду убо вниде в ны неведение? Яве ли яко от непочитания книжнаго!

Увежь же, человече, яко книгы всему добру мати есть, кормящи дети своя. Отселе попытай, любимице святых книг, MHOiy скровищю лежащю в них. И продай же все сущее еже у тебе, и купиши книгы, всяку добродетель спасения и честна сведения святых книг. В них же обрящеши драгый бисер скровен сын Божий, истиньная мудрость Отца, его же кто обрящеть, блажен будеть, пишеть бо ся: блажен человек, иже обрете премудрость. Попытай же, любимице, аще богат еси или нишь, или свободен или работен; святыя бо книгы всему добру скровище есть. То се да обретохом уже святыя книгы и разъгнувше обрящем в них путь спасения, путь вечныя жизни, не имущий всему добру конца. Сему же пути начало святых отець поучение и предъсловие честного покаяния. Да аще кто начало того пути обрет и потечеть по нему, аще ли потонул есть в гресех, темь путемь текай не погрешить жизни вечныя и радости съ всеми святыми. И тому же буди послух, и Святый Дух, научивый прописати душеполезная учения святым отцем. Аще ли кто и свят есть, а по тому пути не потечеть, ему же начало и предъсловье честного покаяния не слышаниемь токмо, но и деломь творения и будеть тако: отимется от него святость и дасться тому, иже кто по тому пути пойдет,

л. 107 об. // въсприем учение и предсловие честного покаяния, не слышаниемь токмо, но и делом творениемь. И будеть таковое творение в радость ангелом и всем святым. Тако бо творяй к тем причтен будеть. Аще ли то ни сице же прияй супернику своему, дондеже еси на путь с нимь, рекше в житии сем. Аще бо сконцаеть ти ся путь, то уже не будеть ти времени покаянию. Блюди же ся, да тебе суперник не предасть судии, и судья тя слугам, и въвержен будеши в тму кромешнюю, и ту будеть плач и скрыжьт зубом. Ничто же бо суть умолчали нам святыя книгы, еже нам на устроение. Мне же слезы приходять, егда услъшю некия и немыя церковьникы глаголюща, яко не суть си в святых книгах писана. Се же токмо простии грамотници глаголють, но и пастуши суще имуще книги пророчьскыя и апостолския, но нрава их не дьржаще. К ним же ныне благое время рещи: о горе вам, наставници слепии, не учившися собре и не утвержени книжным разумом, ризами крашители, а не книгами, оставляшеи слово Божие, а чреву работающей, их же Бог — чрево и слава, иже от овець волну и млеко взимаете, а овець моих не пасуще. О них слово имаете отдати в день суда толика не брегше спасения. О таковых рече Петр: будуть бо, рече, в последняя дни ругатели книгам и по своим похотем ходяще и будуть лживии учители, иже въведуть многых в погыбель. И мнози имуть последовати учению их неспасеному, кривому и слабому. Сии суда не убежать и погыбель их не въздремлеть, в клятве чада оставльше, правое учение и путь и злым учениемь наступиша на путь, идущий в погыбель. Вы же, чада, не всякому духу веру имете, ни злого учение слушайте, нъ разумейте, кое ли есть злое учение, кое ли доброе. Доброе же учение приими, аще и от простого слышиши, а злого учение не приими, аще и свят есть учай тя. То же разумей и Писание глаголеть: аще ли и ангел пришьд учити вы начнеть, не яко же мы учихом, проклят да будеть. Аще ли и от учитель кто придеть к вам не сича учай, не приимайте его, ни челуйте и радуяся не глаголите, творяй бо тако приобщаеться к делом его злым, не пребываяй бо в Христове учении, Бога не имаеть. И пакы всь не пребываяй въ всех писаных — враг Божий есть. И апостол рече: тации суще пасущиися без боязни облачи безводны всеми ветры прогоними, звезды льстивы, их же мрак темен въ веки щадиться. Павел апостол о таковых рече: по ошьствии моемь вънидуть въ вы волци тяжции, нещадяще стада Христова и от самех вас. И пакы рече: съблазнившагося

л. 108 неумением // книжным по первом и по вторем наказании отверзися его.

И с таковыми ни нити, ни ясти. Низвержете злого и с самех вас. Аще ли ти брат так непокорив и не послушаеть трезвого учения, будеть ли короваемолець, или рожаницемолець, или резоемець, или грабитель, или мьздоемець, клеветник, или корчемник, или блудник, или пяяница, или тязосочець или всякым злым делатель и всему завистник, иже бо есть всему злу мати неудобь исцелима — ти бо жизни вечныя не наследять. С таковыми же аще кто любится или дружбу дьржить или ясть или пиеть, — враг есть Божий, и отметник Христов, и похулник духу святому, и причастник пьрвому отступнику своему дияволу. Видите ли, братия, како владыка Христос Бог нашь обличаеть злыя, а добрыя блюдеть и милуеть и пасеть тело всякимь обилием, а душю пашеть учениемь книжным. Первое собою также пророкы, потомь же апостолы, таже святыми отци, таже все то учение духа Святого. Да аще кто похулить или укорить или мнить лжю сущю, — то противьник есть Духу Святому. А еуангелист пишеть: аще кто речеть хулу на Дух Святый, не отдасться ему ни в сий век, ни в будущий. Кде суть гордоустьци и тщесловници вещающе, яко не глаголистися сим в святых книгах, им же есть Бог и чрево и слава смышляще земная и потаковници злым и ругатели правоверным? Вы же, чада, блюдитесь лживых учитель и глаголющих: несть крестьяном мучения, любо грешну, любо негрешну. О зло и дияволи прольсти живущих в таковых человечех многым невежам на naiy6y! О горе человеку тому, иже тако глагалеть! Не отдасться ему ни в сий век, ни в будущий. Аще не проклинеть сам своего глаголания пред человекы, пред ними же глаголал, и не придеть на покаяние, то луче бы ся и не родил. То не слышите ли никто же Господа глаголюща, сущим ошюю: идете от мене, проклятии, в огнь вечный, уготованый дияволу и ангелом его. Аще ли кто речеть, то не крестьяном глаголеть, но поганым, и аз рку же и о поганых: тако глаголеть Господь: сего ради не въскреснуть нечествии на суд. Вижь же: не поганым глаголеть, по крестьяном, не творившим воля Божия, не ходившим по заповедем Господним. И пакы рече Господь: в оны дни мнози ркуть ми: Господи, Господи, не в Твое ли имя крестихомъся и в Твое имя многа чюдеса створихом? Господь же речеть к ним: аще в имя Мое крестистеся и многа чюдеса створисте, но воля Моея не твористе, идете от Мене, не веде вас. И многа указания о томь в писании глаголеть, но и се годе есть имущим ум добр. Вы же, братя и чада моя милая, яже есте о Христе, аще кто вас разум имаеть, не слушайте лживых учитель, ни дружбы держите с таковыми, ни пити, ни ясти. И укланяйте же ся зло (го) и не приимете зла. Пророк рече: Господи, не съчетай мене с прелщимися, и л. 108 об. с нечестивыми // не сяду, с законопреступники не вниду. Господи, ненавидящая Тебе възненавидех, свершеною ненавистью възненавидех их, хулящая заповеди Твоя истаях. Аз же, Господи, вся заповеди твоя възлюбих. Мы же, чада, елико же и есть христолюбивых приимем заповеди Его творяще волю Его, не слухомь токмо слушающе, но и волю Его делю делы творяще, и получим жизнь вечную о Христе Исусе Господе нашемь, Ему же слава.