Молитва св. Великомученику і Цілителю Пантелеймону (27 липня)

1. О великий угодниче Христов, страстотерпче і врачу многомилостивий Пантелеімоне! Умилосердися надо мною, грішним рабом, услиши стенаніє і вопль мой, умилостиви небеснаго, верховнаго Врача душ і тілес наших, Христа Бога нашего, да даруєт ми ісціленіє от недуга, мя гнітущаго. Приіми недостойноє моленіє грішнійшаго паче всіх человік. Посіти мя благодатним посіщенієм. Не возгнушайся гріховних язв моїх, помажи їх єлеєм милості твоєя і ісціли мя: да здрав сий душею і тілом, остаток дній моїх, благодатію Божією, возмогу провести в покаянії і угожденії Богу і сподоблюся восприяти благий конец житія моєго. Єй, угодниче Божий! умоли Христа Бога, да предстательством твоїм даруєт здравіє тілу моєму і спасеніє душі моєй. Амінь.

2. О, преславний мучениче і добрий воіне Небеснаго Царя Пантелеімоне преблаженне, милостиваго Бога преізрядний подражателю, іже Христа на землі дерзновенно ісповідав і многообразния за Него муки претерпів, неувядаємий приял єси вінец на небесі, ідіже вічнаго наслаждаєшися блаженства і со дерзновенієм престолу трисолнечнаго Божества предстоіши! К твоєму христоподражательному состраданію по Бозі прибігаєм всі ми грішнії і всеусердно молим тя, теплаго заступника і предстателя нашего: не престай призирати на нас, сущих в нуждех і скорбних обстояніях, і твоєю молитвенною помощію і цільбоподательною силою ізбавляй нас присно от лютих зол, всегубительства і всякія іния біди і болізні. Ти бо приял єси, святе, неоскудную благодать ісціленій от Спаса нашего Ісуса Христа за твердую к Нему віру, твоїм непорочним житієм запечатлінную, мученічеством же і многобідною твоєю кончиною, увінчанную в нейже по данній ті благодаті і от Христа Пантелеімоном, милості тезоіменитим, наіменован бил єси. Сего ради, відуще тя милостиваго ко всім помощника і цілителя, с вірою взиваєм к тебі; твоїм богоприятним ходатайством подавай нам вся благопотребная в житії сем і нужная к вічному спасенію. Мученическим же дерзновенієм твоїм умоли милостиваго Бога, да помилуєт нас, грішних і недостойних, по велицій милості Своєй, да ізбавит от труса, потопа, огня, меча і всякаго праведнаго гніва і прещенія благовременно подвизая нас к очистительному і умилостивительному во грісіх наших покаянію, ради множества щедрот Своїх, да подаст всім нам безбідноє, тихоє і богоугодноє житіє, і всіх нас от враг видимих і невидимих да сохранит благодатію Своєю і непобідимим ополченієм ангел Своїх, імиже ограждаєми і наставляєми да поживем в віці сем в покаянії, чистоті і в творенії богоугодних діл: да сподобимся твоїм теплим предстательством христіанскую кончину улучити безболізненну, мирну, непостидну, ізбавитися от козней воздушних князей тьми і от вічния муки, і бити наслідниками безконечнаго, всеблаженнаго царствія. Єй, угодниче Божий! не престай молитися за ни грішния, да твоїм ходатайством от временних і вічних бід ізбавлені, величаєм тебе, заступника нашего і молитвенника, і вічно прославляєм общаго Владику і Господа нашего Ісуса Христа, Ємуже подобаєт всякая слава, честь і поклоненіє со Безначальним Єго Отцем і Пресвятим Духом, нині і присно і во віки віков. Амінь.