Собору преподобных отцев и старцев Оптинских (11/24 октября)

Собору преподобных отцев и старцев Оптинских (11/24 октября)

Тропарь, глас 6:

Православныя веры светильницы,/ монашества непоколебимии столпи,/ земли Российския утешителие,/ преподобнии старцы Оптинстии,/ любовь Христову стяжавшии/ и души своя за чада полагавшии,/ молитеся ко Господу,/ да утвердит земное отечество ваше/ в Православии и благочестии// и спасет души наша.

Кондак, глас 4:

Воистину дивен Бог во святых Своих,/ пустынь Оптину якоже вертоград старчества явивый,/ идеже богопросвещеннии отцы,/ тайная сердца человеческаго ведуще,/ народа Божия печальницы доблии явишася:/ сии бо на путь покаяния грехом отягощенныя наставиша,/ в вере колеблющияся светом Христова учения просветиша/ и Божией премудрости научиша,/ страждущим и немощным спострадаша и исцеления дароваша,/ ныне же, во славе Божией пребывающе,// молитеся непрестанно о душах наших.

Величание:

Ублажаем вас,/ преподобнии отцы наши старцы Оптинстии,/ и чтим святую память вашу,/ наставницы монахов// и собеседницы Ангелов.