Глава 6

Глава 6

1 И сия заповеди и оправдания и суды, елика заповеда Господь Бог ваш научити вас творити тако на земли, в нюже вы входите тамо, наследити ю:

2 да боитеся Господа Бога вашего, хранити вся оправдания его и заповеди его, яже аз заповедаю тебе днесь, ты и сынове твои, и сыны сынов твоих, во вся дни живота твоего, да многи дни пребудете.

3 И послушай, израилю, и снабди творити, да благо ти будет, и да умножитеся зело, якоже глагола Господь Бог отец ваших, дати тебе землю кипящую млеком и медом. И сия оправдания и суды, елика заповеда Господь (Бог) сыном израилевым в пустыни, изшедшым им из земли египетския.

4 Слыши, израилю: Господь Бог наш Господь един есть.

5 И возлюбиши Господа Бога твоего от всего сердца твоего и от всея души твоея и от всея силы твоея.

6 И да будут словеса сия, яже аз заповедаю тебе днесь, в сердцы твоем и в души твоей,

7 и да накажеши ими сыны твоя, и да возглаголеши о них седяй в дому и идый путем, и лежа и востая:

8 и навяжеши я в знамение на руку твою, и да будут непоколеблема пред очима твоима:

9 и да напишете я на празех храмине ваших и врат ваших.

10 И будет егда введет тя Господь Бог твой в землю, еюже клятся отцем твоим, аврааму и исааку и иакову, дати тебе грады велики и добры, ихже не создал еси,

11 домы полны всяких благ, ихже не наполнил еси, потоки ископаны, ихже не ископал еси, винограды и маслины, ихже не насадил еси: и ядый и насытився,

12 вонми себе, да не разширится сердце твое, да не забудеши Господа Бога твоего, изведшаго тебе из земли египетския, от дому работы.

13 Господа Бога твоего да убоишися, и тому единому послужиши, и к нему прилепишися, и именем его кленешися.

14 Да не ходите вслед богов иных, богов языческих, иже окрест вас:

15 яко Бог ревнив Господь Бог твой посреде тебе: да не разгневався яростию Господь Бог твой на тя, потребит тя от лица земли.

16 Да не искусиши Господа Бога твоего, якоже искушасте во искушении.

17 Храня да сохраниши заповеди Господа Бога твоего, свидения его и оправдания его, елика заповеда тебе:

18 и да сотвориши угодное и благое пред Господем Богом твоим, да благо будет тебе, и внидеши и наследиши землю благую, еюже клятся Господь отцем вашым,

19 отгнати вся враги твоя от лица твоего, якоже глагола Господь.

20 И будет егда вопросит тя сын твой утре, глаголя: что суть свидения и оправдания и суды, елика заповеда Господь Бог наш нам?

21 и речеши сыну твоему: раби бехом фараону в земли египетстей, и изведе нас Господь Бог оттуду рукою крепкою и мышцею высокою:

22 и даде Господь (Бог) знамения и чудеса велика и зла во египте на фараона и на дом его и на силу его пред нами,

23 и нас изведе Господь Бог наш оттуду, да введет нас дати нам землю сию, еюже клятся Господь Бог наш отцем нашым, дати ю нам:

24 и заповеда нам Господь творити вся оправдания сия, боятися Господа Бога нашего, да благо будет нам во вся дни, да живем, якоже и днесь,

25 и милосердие будет нам, аще сохраним творити вся заповеди закона сего пред Господем Богом нашим, якоже заповеда нам.