Глава 57
Глава 57
1 Видите, како праведный погибе, и никтоже не приемлет сердцем, и мужие праведнии вземлются, и никтоже разумеет: от лица бо неправды взяся праведный.
2 Будет с миром погребение его, взяся от среды.
3 Вы же приидите семо, сынове беззаконнии, семя прелюбодеев и блудницы:
4 в чем услаждастеся и на кого отверзосте уста ваша? и на кого изсунусте язык ваш? не вы ли есте чада пагубы, семя беззаконно,
5 молящиися кумиром под древием частым, закалающе чада своя в дебрех посреде камения?
6 То твоя часть, сей твой жребий, и тем пролиял еси возлияния, и тем принесл еси жертвы: о сих убо не разгневаюся ли?
7 На горе высоце и превознесенне, тамо твое ложе, и тамо вознесл еси требы твоя:
8 и за подвоями дверий твоих положил еси память твою: мыслил еси, яко аще от мене отступиши, более нечто возимееши: возлюбил еси спящыя с тобою,
9 и умножил еси блужение твое с ними, и многи сотворил, иже далече от тебе, и послал еси послы за пределы твоя, и смирился еси даже до ада.
10 Многими путьми твоими трудился еси, и не рекл еси: престану крепящься, яко сотворил еси сия, сего ради не помолился ми еси ты.
11 Кого благопочет убоялся еси, и солгал ми, и не помянул еси мене, ниже приял мя еси во ум, ниже в сердце твое? и аз тя видя, презираю, и не убоялся еси мене.
12 И аз возвещу правду твою и злобы твоя, яже не успеют тебе:
13 егда возопиеши, да избавят тя во печалех твоих: сия бо вся ветр возмет, и отнесет буря: а держащиися мене стяжут землю и наследят гору святую мою.
14 И рекут: очистите пред лицем его пути и отимите претыкания от пути людий моих.
15 Сия глаголет Господь вышний, иже живет во высоких во век, святый во святых имя ему, вышний, во святых почиваяй, и малодушным даяй долготерпение и даяй живот сокрушеным сердцем:
16 не во век отмщу вам, ни всегда гневатися буду на вы: дух бо от мене изыдет, и всякое дыхание аз сотворих.
17 За грех мало что опечалих его и поразих его и отвратих лице мое от него: и опечалися и пойде дряхл во путех своих.
18 Пути его видех и изцелих его, и утеших его и дах ему утешение истинно,
19 мир на мир далече и близ сущым: и рече Господь: изцелю я.
20 Неправеднии же возволнуются и почити не возмогут.
21 Несть радоватися нечестивым, рече Господь Бог.