Глава 7

Глава 7

1 По сих же словесех, в царство артаксеркса царя персскаго, взыде ездра сын сареа, сына азариева, сына хелкиева,

2 сына селлумля, сына саддукова, сына ахитовля,

3 сына самариева, сына есриева, сына мареофова,

4 сына зараиева, сына езеиева, сына воккиева,

5 сына ависуева, сына финеесова, сына елеазарова, сына аарона священника перваго:

6 сей ездра взыде от вавилона и сей писец скор в законе моисеове, егоже даде Господь Бог израилю. И даде ему царь, яко рука Господа Бога его на нем бе во всех, яже искаше он.

7 И взыдоша от сынов израилевых и от священников и от левитов, и певцы и придверницы и нафиними во Иерусалим, в лето седмое артаксеркса царя,

8 и приидоша во Иерусалим месяца пятаго: сие есть лето седмое царево:

9 зане в первый день месяца перваго той нача восходити от вавилона, и в первый день месяца пятаго приидоша во Иерусалим, яко рука Бога его блага на нем бе:

10 ездра бо уготова сердце свое, да взыщет закона (Господня) и да творит и учит во израили повелением и судбам.

11 И сие есть сказание послания еже даде царь артаксеркс ездре священнику, писцу книги словес заповедий Господних и повелений его во израили:

12 артаксеркс царь царей ездре священнику, писцу закона Господа Бога небеснаго: да совершится слово и ответ:

13 от мене повелено есть, да кийждо, иже имать усердие благо во царстве моем от людий израилевых и от священников и от левитов поити во Иерусалим, с тобою да идет:

14 от лица царева и седми советников его послан еси, да посетиши иудею и Иерусалим в законе Бога их, сущем в руку твоею,

15 и да отнесеши в дом Господень сребро и злато, еже царь и советницы его со усердием даша Богу израилеву, иже во Иерусалиме обитает,

16 и все злато и сребро, еже аще обрящеши во всей области вавилонстей, с добровольным даянием людским и священников, волею приносящих в дом Божий, иже во Иерусалиме:

17 и всякий доход той усердно впиши в книгу сию: телцы, овны, агнцы, и жертвы их и возлияния их: и принеси та на олтарь дому Бога вашего, иже есть во Иерусалиме:

18 и аще что тебе и братии твоей благо возмнится от оставшагося сребра и злата сотворити, якоже угодно Богу вашему, сотворите:

19 и сосуды, иже даны тебе в службу дому Божия, вдаждь пред Богом во Иерусалиме:

20 и прочыя потребы дому Бога твоего, еже аще возмнится тебе дати, да даси из домов сокровища царева

21 и от мене аз артаксеркс царь уставих повеление всем хранителем сокровищ, иже суть за рекою, да все, еже аще воспросит от вас ездра священник и писец закона Бога небеснаго, готово да будет:

22 сребра даже до ста талант, и пшеницы даже до ста мер, и вина даже до ста бочек, и елеа даже до ста чванов, а соли без записания:

23 все, еже есть по воли Бога небеснаго, да будет в дому Бога небеснаго: вонмите, да не кто прострет руку на дом Бога небеснаго, да не когда будет гнев на царство царево и сынов его:

24 и вам знаемо творим сие, от всех священников и левитов, певцев, дверников, нафинимов и слуг дому Божия дань да не будет тебе, ниже имейте власти порабощати их:

25 ты же, ездра, по премудрости Бога твоего, яже в руце твоей, постави книжники и судии, да судят вся люди, иже суть за рекою, всем знающым закон Бога твоего, и не ведающему ведати сотворите:

26 и всяк, иже не сотворит закона Бога твоего и закона царева усердно, суд да будет сотворен на него, аще в смерть, или в наказание, или во отщетение живота, или в темницу.

27 Благословен Господь Бог отец наших, иже даде сице в сердце царево, да прославит дом Господень, иже во Иерусалиме,

28 и на мя уклони милосердие пред очима царя и советников его и всех князей царевых сильных: и аз укреплен бых, яко рука Божия благая на мне, и собрах от израиля князей взыти со мною.