Глава 13

Глава 13

1 В лето осмоенадесять царства иеровоамля воцарися авиа над иудою:

2 три лета царствова во Иерусалиме. Имя же матери его мааха дщерь уриилева от гаваона. И бе брань между иеровоамом и между авиею.

3 И ополчися авиа в силе воинския силы, в четырех стах тысящах мужей сильных: иеровоам же устрои сопротиву его брань во осми стах тысящах мужей военных крепких силою.

4 Ста же авиа на горе сомори, яже есть на горе ефремли, и рече: слышите иеровоам и весь израиль:

5 или не весте, яко Господь Бог израилев даде царство давиду над израилем во веки и сыновом его в завет вечен?

6 и воста иеровоам сын наватов, раб соломона сына давидова, и отвержеся от господина своего:

7 и собрашася к нему мужие пагубнии, сынове законопреступнии, и воста противу ровоама сына соломонова, ровоам же бе юнейший и сердцем страшлив, и не возможе противостати лицу его:

8 и ныне вы глаголете противостати лицу Царства Господня в руце сынов давидовых: и вы мнози зело, и с вами телцы златии, ихже сотвори вам иеровоам в боги:

9 не извергосте ли священников Господних сынов аароних и левитов, и сотвористе себе жерцы от людий всея земли, приходяй наполнити руку свою телцем от волов и обнами седмию, и сотворися жерцем не сущему богу:

10 мы же Господа Бога нашего не оставихом, и священницы его служат Господу, сынове аарони и левити,

11 и по чредам своим жрут Господу всесожжения утро и пред вечером, и фимиам сложения, и предложения хлебов на трапезе чистей, и светилник златый, и свещники возжжения возжизати к вечеру: мы бо храним стражбы Господа Бога отец наших, вы же его остависте:

12 и се, с нами в начале Господь, и священницы его, и трубы знаменования, еже знаменати противу вам: сынове израилевы, не ратуйте противу Господа Бога отец ваших, понеже не благопоспешится вам.

13 Иеровоам же обрати подсаду приити ему созади, и бысть противу иуды (сам), подсада же созади.

14 И обратися иуда, и се, ему брань сопреди и созади, и возопиша ко Господу, и священницы вострубиша трубами:

15 и возопиша мужие иудины. И бысть вопиющым мужем иудиным, и Господь порази иеровоама и израиля пред авиею и иудою:

16 и бежаша сынове израилевы от лица иуды, и предаде их Господь Бог в руки их:

17 и порази их авиа и людие его язвою великою, и падоша ранени от израиля пять сот тысящ мужей крепких.

18 И смиришася сынове израилевы в день той, и укрепишася сынове иудины, яко уповаша на Господа Бога отец своих.

19 Погна же авиа вслед иеровоама и взя от него грады: вефиль и села его, и иесину и села ея, и ефрон и села его.

20 И не возможе ктому противитися иеровоам во вся дни авии, и порази его Господь: и умре.

21 Авиа же укрепися, и поят себе жен четыренадесять, и роди двадесять два сына и шестьнадесять дщерей.

22 Прочая же словеса авиева и деяния его и словеса его писана в книзе адды пророка.