Глава 16
Глава 16
1 Не желай чад множества неключимых, ниже веселися о сынех нечестивых: егда умножатся, не веселися о них, аще несть страха Господня с ними.
2 Не веруй животу их и не належи на множество их:
3 лучше бо един праведник, нежели тысяща (грешник),
4 и умрети безчадному, нежели имети чада нечестива:
5 от единаго бо разумна населится град, колено же беззаконных запустеет.
6 Многа сицевая виде око мое, и крепльшая сих слыша ухо мое.
7 В соборищи грешных возгорится огнь, и во языце непокориве возгорится гнев.
8 Не умолен бысть (Бог) о древних исполинех, иже отступиша крепостию своею:
9 не пощаде о жилищи лотове, имиже возгнушася за гордыню их:
10 не помилова языка погибельнаго, вознесшагося во гресех своих,
11 и тако шесть сот тысящ пешцев, сошедшихся в жестосердии своем. И аще будет един жестоковыйный в людех, дивно есть сие, аще неповинен будет.
12 Милость бо и гнев у него, силен умолен быти и излияти гнев.
13 По мнозей милости его, тако много и обличение его: мужеви но делом его судит.
14 Не убежит хищением грешный, и терпение благовернаго не лишено будет.
15 Всяцей милостыни сотворит место: кийждо бо по делом своим обрящет.
16 Не рцы, яко от Господа скрыюся, еда свыше кто мя помянет?
17 в людех множайших не воспомянен буду, что бо есть душа моя в безчисленней твари?
18 се, небо и небо небесе Божия, бездна и земля посещением его подвигнутся:
19 вкупе горы и основания земли, егда воззрит на ня, трепетом стрясутся,
20 и о сих не размыслит сердце:
21 и пути его кто постигнет? и бурю юже не узрит человек, множайшая же дел его в сокровенных:
22 дела правды его кто возвестит? или кто стерпит? далече бо завет.
23 Умаляяйся сердцем размышляет сия, а муж безумен и заблуждаяй размышляет буяя.
24 Послушай мене, чадо, и научися ведения, и на словеса моя внимай сердцем твоим:
25 изявляю в мериле наказание и со испытанием возвещу ведение.
26 Судом Господним дела его из начала, и от сотворения его раздели части их:
27 украси во век дела своя, и начала их в роды их: ниже взалкаша, ниже утрудишася, и не престаша от дел своих.
28 Кийждо искренняго своего не оскорби,
29 и даже до века не воспротивятся глаголголу его.
30 И по сих Господь на землю призре и исполни ю от благ своих:
31 душа всякаго животна покры лице ея, и в ню возвращение их.