Глава 22

Глава 22

1 Что бысть тебе, яко ныне возлезосте вси на храмины тщетныя?

2 Наполнися град вопиющих, уязвленнии твои не мечьми уязвлени, ниже мертвецы твои умерщвлени ратию:

3 вси князи твои побегоша, и плененнии жестоце суть связани, и крепцыи в тебе далече отбежаша.

4 Сего ради рекох: оставите мене, да горце восплачуся: не належите утешати мя о сокрушении дщере рода моего:

5 яко день мятежа и пагубы и попрания, и смятение от Господа саваофа: в дебри сиони скитаются, от мала даже до велика скитаются по горам.

6 Еламите же взяша тулы, и всадницы человецы на конех, и собор ополчения.

7 И будут избранны дебри твоя, наполнятся колесниц, конницы же заступят врата твоя

8 и открыют врата иудина, и воззрят в той день во избранныя домы града,

9 и открыют сокровенная домов краеградия давидова, и узрят, яко множайшии суть, и яко отвратиша воду древния купели во град,

10 и яко разориша домы Иерусалимли на утверждение стене градней.

11 И сотвористе себе воду между двема стенама, внутрьуду купели древния, и не воззресте на сотворившаго ю исперва, и сограждшаго ю не видесте.

12 И призва Господь, Господь саваоф в той день плачь и рыдание, и острижение и препоясание во вретища:

13 тии же сотвориша радость и веселие, закалающе телцы и жруще овцы, яко ясти мяса и пити вино, глаголюще: да ямы и пием, утре бо умрем.

14 И откровенна сия суть во ущию Господа саваофа, яко не оставится вам той грех, дондеже умрете.

15 Сице глаголет Господь саваоф: иди в кущу ко сомнану строителю дому и рцы ему:

16 что ты зде, и что тебе зде, яко истесал еси себе зде гроб и сотворил еси себе на высоце гроб, и написал еси себе на камени кущу?

17 Се, ныне Господь саваоф извержет и сотрет мужа, и отимет утварь твою и венец твой славный,

18 и повержет тя во страну велику и безмерну, и тамо умреши: и положит колесницу твою добрую в безчестие и дом князя твоего в попрание:

19 и извержешися от строителства твоего и от степене твоего.

20 И будет в той день, и призову раба моего елиакима сына хелкиева

21 и облеку его во утварь твою, и венец твой дам ему и державу твою, и строителство твое дам в руце его, и будет яко отец живущым во Иерусалиме и живущым во иудеи.

22 И дам ему славу давидову, и обвладеет, и не будет противоглаголющаго: и дам ему ключь дому давидова на рамо его, и отверзет, и не будет затворяющаго, и затворит, и не будет отверзающаго.

23 И поставлю его князя на месте верне, и будет на престоле славы дому отца своего.

24 И будет уповаяй на него всяк славный в дому отца его, от мала даже до велика: и будут зависяще на нем.

25 В той день, сия глаголет Господь саваоф, подвигнется человек утвержден на месте верне, и отимется, и падет, и потребится слава, яже на нем, яко Господь глагола.