Глава 7
Глава 7
1 Не твори зла, и не постигнет тя зло:
2 отступи от неправды, и уклонится от тебе.
3 Сыне, не сей на браздах неправды и не имаши пожати их седмерицею.
4 Не проси у Господа владычества, ниже от царя седалища славы.
5 Не оправдай себе пред Богом и пред царем не мудрися.
6 Не ищи, да будеши судия, егда не возможеши отяти неправды: да не когда убоишися лица сильнаго и положиши соблазн в правости твоей.
7 Не согрешай во множестве града и не низлагай себе в народе.
8 Не свяжи дважды греха, и во единем бо не неповинен будеши.
9 Не рцы: на множество даров моих воззрит, и приносящу ми Богу вышнему, приимет.
10 Не малодушествуй в молитве твоей и милостыню творити не презри.
11 Не ругайся человеку сущу в горести души его: есть бо смиряяй и возносяй.
12 Не ори лжи на брата твоего, ниже другу тожде твори.
13 Не восхощи лгати всякия лжи: учащение бо ея не на благо.
14 Не буди велеречив во множестве старец и не повтори слова в молитве твоей.
15 Не возненавиди труднаго дела и земледелия от вышняго создана.
16 Не привменяй себе ко множеству грешников.
17 Смири душу твою зело.
18 Помяни, яко гнев не замедлит,
19 понеже месть нечестиваго огнь и червь.
20 Не измени друга ни на что, ни брата присна на злате софирстем.
21 Не отступай от жены премудры и благи, ибо благодать ея паче злата.
22 Не озлоби раба делающа во истине, ниже наемника вдающа душу свою.
23 Раба разумива да любит душа твоя, и не лиши его свободы.
24 Есть ли ти скот, призирай его, и аще ти будет потребен, да пребудет ти.
25 Суть ли ти чада, накажи я и преклони от юности выю их.
26 Суть ли ти дщери, внимай телу их и не являй веселаго к ним лица твоего.
27 Выдай дщерь, и будеши совершивый дело велико: и мужеви разумиву даждь ю.
28 Есть ли ти жена по души, не изжени ея.
29 Всем сердцем твоим прославляй отца твоего и матерних болезней не забуди:
30 помяни, яко тема рожден еси, и что има воздаси, якоже она тебе?
31 Всею душею твоею благоговей Господеви и иереи его чти.
32 Всею силою (твоею) возлюби сотворшаго тя и служителей его не остави.
33 Бойся Господа и прослави иереа, и даждь часть ему, якоже заповедано ти:
34 начатки, и о согрешении, и даяние мышцей, и жертву святыни, и начаток святых.
35 И нищему простри руку твою, да совершится благословение твое.
36 Благодать даяния пред всяким живым (да будет), и над мертвецем не возбрани благодати.
37 Не устраняйся от плачущих и с сетующими сетуй.
38 Не ленися посещати боляща: сими бо возлюблен будеши.
39 Во всех словесех твоих поминай последняя твоя, и во веки не согрешиши.