Глава 60

Глава 60

1 Светися, светися Иерусалиме, прииде бо твой свет, и слава Господня на тебе возсия.

2 Се, тма покрыет землю, и мрак на языки, на тебе же явится Господь, и слава его на тебе узрится.

3 И пойдут царие светом твоим, и языцы светлостию твоею.

4 Возведи окрест очи твои и виждь собраная чада твоя: се, приидоша вси сынове твои издалеча, и дщери твоя на рамех возмутся.

5 Тогда узриши и возрадуешися, и убоишися и ужаснешися сердцем, яко преложится к тебе богатство морское и языков и людий:

6 и приидут к тебе стада велблюд, и покрыют тя велблюди мадиамстии и гефарстии: вси от савы приидут, носяще злато, и ливан принесут и камень честен, и спасение Господне благовозвестят:

7 и вся овцы кидарския соберутся тебе, и овни навеофстии приидут к тебе, и вознесутся приятная на жертвенник мой, и дом молитвы моея прославится.

8 Кии суть, иже яко облацы летят, и яко голубие со птенцы ко мне?

9 Мене острови ждаша, и корабли фарсийстии во первых, привести чада твоя издалеча, и сребро и злато их с ними, имене ради Господня святаго, и за еже святому израилеву славну быти.

10 И созиждут сынове инороднии стены твоя, и царие их предстояти будут тебе: за гнев бо мой поразих тя и за милость мою возлюбих тя.

11 И отверзутся врата твоя присно, день и нощь не затворятся, ввести к тебе силу язык и цари их ведомыя.

12 Языцы бо и царие, иже не поработают ти, погибнут, и языцы запустением запустеют.

13 И слава ливанова к тебе приидет, кипарисом и певгом и кедром вкупе, прославити место святое мое, и место ногу моею прославлю.

14 И пойдут к тебе боящеся сынове смиривших тя и раздраживших тя, и поклонятся следам ногу твоею вси прогневавшии тя, и наречешися град Господень, сион святаго израилева.

15 За сие, яко был еси оставлен и возненавиден и не бе помагающаго ти, положу тя в радость вечную, веселие родом родов.

16 И изссеши млеко языков и богатство царей снеси, и уразумееши, яко аз Господь спасаяй тя и избавляяй тя Бог израилев.

17 И вместо меди принесу ти злато, и вместо железа принесу ти сребро, и вместо древес принесу ти медь, и вместо камения железо: и вдам князи твоя в мир и надзиратели твоя в правду.

18 И не услышится посем неправда в земли твоей, ни сокрушение ни бедность во пределех твоих, но прозовется спасение забрала твоя и врата твоя хвала.

19 И не будет тебе ктому солнце во свет дне, ниже восход луны просветит твою нощь, но будет тебе Господь свет вечный и Бог слава твоя.

20 Не зайдет бо солнце тебе, и луна не оскудеет тебе: будет бо Господь тебе свет вечный, и исполнятся дние рыдания твоего.

21 И людие твои вси праведнии в век наследят землю, храняще сад дела руку его в славу.

22 Малый будет в тысящы, а малейший во язык велик: аз Господь по времени соберу их.